Dili – Iha selebrasaun bisentenáriu Don Bosco nia moris, Inspetoria FMA-TIN agradese Maromak ba don vokasaun ne’ebé Nia kontinua haraik ba Família Saleziana, hanesan ba Asosiasaun Salezianu kooperadór/a sira, ba Sosiedade S. Francisco de Sales no ba Institutu Filhas de Maria Auxiliadora.

Nune’e, mak ohin Família Saleziana fó sasin ba ritu profisaun perpétua FMA na’in tolu nian: Ir Theresia  Tuto, Ir Alice Filipe no Ir Elizita da Silva. Sira na’in tolu asina iha Na’i nia altár sira-nia kompromisu atu saran an ba nafatin ba Nia hodi serví foin-sa’e sira, tuir Don Bosco no Madre Mazzarello sira-nia karizma. Sira-nia kompromisu mak resposta ba Maromak nia domin rohan-laek

Prezente iha selebrasaun Irmán FMA sira husi komunidade sanulu iha Timor-Leste, maluk SDB sira, relijiozu/a sira husi kongregasaun seluk, joven sira no FMA perpetuande nia família sira.

Padre Virgílio do Carmo, provinsiál SDB nian mak prezide misa hamutuk ho amlulik na’in ualu seluk.

Iha ninia omilia, Pe. Virgílio, esplika signifikadu liafuan profisaun perpétua. Uluknanai, “Profisaun sai sinál…sinál ida domin rua buka malu to’o hetan, domin Maromak nian ne’ebé bolu no ita ema nian ne’ebé hatán”. Hafoin, “profisaun ida-ne’e mak sinál ida vizivel, halo iha públiku, ema hotu haree…vizibilidade ne’e haree husi ita-nia moris, ita-nia hahalok, ita-nia fuan, ita nu’udar espellu ba sosiedade ohin loron… sai sasin Kristu nian iha joven sira-nia leet, iha sosiedade nia laran”. Datoluk, profisaun ne’e “escolha livre ida, ne’ebé sira rasik mak hili ho liberdade tomak”.

Liafuan seluk ne’ebé Amu Virgílio esplika nia signifikadu mak liafuan “perpétua”, katak “ba nafatin”. Nia fó sai kondisaun rua atu tau iha neon. Uluknanai “totalidade”. Nia eplika katak “totalidade katak fó hotu kedas”. La’ós fó de’it oras balun, maibé “ba Maromak fó hotu kedas no lahó kondisaun”. Liafuan perpétua husu kondisaun seluk tan, katak, ba nafatin, la’ós ba tinan ida de’it, eh tinan tolu, “fó to’o rohan”. Hanesan lema ne’ebé Irmán na’in tolu hili ba sira: “Ha’u hadomi imi ho domin rohan-laek”. Nune’e sira-nia resposta “Ha’u hadomi Maromak to’o rohan”.

Perigu no tentasaun mai ita hotu, mak buat ne’ebé Pe.Virgílio hanaran “vida-rua”, katak moris la koerente, moris ho “ain la’o iha dalan rua”. Nune’e buka tau ai-riin forte ba fidelidade, katak “orasaun”.

Liamenon husi Provinsiál FMA, Ir Alma Castagna mak husu família no belun sira atu suporta nafatin sira, basá hanesan ita hatene, katak “Maromak bolu ita ho ita-nia frakeza sira”. Nia husu atu “iha-ne’ebé de’it Maromak sei haruka sira, atu servisu saida nafatin ita hamutuk sira, ita suporta  sira no ita hein katak sira bele hatán nafatin ho ksolok no sai boot ba nafatin”.

Ikusnian Irmán Theresia, Ir Alice no Ir Elezita hato’o sira-nia agradesimentu: “Ha’u hadomi ó ho domin rohan-laek tan ne’e ha’u kontinua hadomi ó to’o rohan. Pasajen bíblika ida-ne’e akompaña ami na’in tolu iha ami-nia hilin. Maski nu’udar ema, dalaruma ami la hadomi ho domin ne’ebé totál, ohin ami hakotu lia ka halo aliansa domin nian no Ida-ne’ebé bolu no fihir ami. Imi hotu iha-ne’e nu’udar ami-nia sasin domin nian ho Na’i. Reza mai ami, tulun ami ho imi-nia hanoin sira, atu ami bele hadomi Nia ne’ebé bolu ami, to’o rohan”.