Fuiloro – Loron ikus  forum MJS nian (21-08-2015), partisipante sira hamutuk  maizumenus ema na’in 800.  Iha dadeer hahú ho Laudes ne’ebé responsavel husi FMA sira ne’ebé partispa  iha eventu nee. Bainhira remata kontinua kedas ho avaliasaun husi komunidade ida-idak kona ba atividade ne’ebé hala’o iha loron tolu nia laran.  Partisipante barak mak apresia ba atividade ne’ebé oferese ba sira no iha posibilidade atu aprende  no koñese liután Don Bosco nia moris husi kiik too realiza nia mehi.

Iha oras tuku 9:30 misa enserramentu ba forum MJS nian prezide husi Padre Provinsiál, Pe. Virgilio do Carmo da Silva, sdb, ho konselebrante padre na’in 14 hamutuk ho Diálonu Isaias SDB.  Iha omilia padre provinsiál hahú hodi kumprimenta ida-idak ho liafuan DB nian dehan: “Ba imi ha’u estuda, reza no servisu”.

«Hanesan ita nia tema HANESAN DON BOSCO HO FOI-NSA’E BA FOIN-SA’E SIRA. Sei ki’ik kedas DB laran manas ona atu tau matan ba nia maluk sira. Nune’e loron ida nia dehan wainhira nia haree amlulik sira ne’ebé ladún liga foin-sa’e sira hodi dehan : Se loron ida ha’u sai nailulik karik ha’u sei tau matan ba labarik no foinsa’e hirak ne’e. Iha Evangellu aprezenta foin-sa’e ida ne’ebé husu ba Jezús atu hetan moris rohan laek. Jezús haree iha foin-sa’e ne’e mehi ida aas tebes, Jezús preokupa ho foin-sa’e ida ne’e. Papa Francisco dehan ba foin-sa’e sira iha enkontru hamutuk ho foin-sa’e sira: “Tempu foin-sa’e mak tempu atu deskobre saida mak Maromak hakarak mai ita nia moris. Deskobre kona-ba ita nia-an”. Reitór-Mor iha enkontru ho joven sira mós  deha : “imi joven sira mak  “FAVOLOSO”; imi nia tempu  importante tebes no susar atu kompara.  Se imi la aproveita, DB dehan, imi tenke aproveita moris juventude nian atu halo buat ne’ebé di’ak”.

No  saida mak ita tenke halo iha tempu ida ne’e?

“Iha primeira leitura dehan, matenek hotu mai husi Maromak. Foin-sa’e sira tenke aprende atu obedese ka halo tuir. Aprende atu moris iha justisa, (respeita). Ikus liu dehan tenke aprende atu iha pasiénsia. Iha segunda leitura saun Paulo aprezenta “KSOLOK” mak bele manán buat hotu. Ksolok la’ós hamnasa de’it maibé tanba ita hasoru ona Jezús, ksolok ne’e tenke mai husi fuan. No iha Evanjellu atitude ne’ebé presiza haburas mak “ haraik-an. Ida ne’e mak xave atu sai ema di’ak. Nee mak obrigasaun ida la’ós opsaun. Iha enkontru ho foin-sa’e sira, sira husu  ba Amu-Papa: foin-sa’e sira ohin loron  susar atu moris iha domin tanba sá? Tanba ita nia mundu ohin loron moris iha kultura foer nian ne’ebé tama iha  ema nia hahalok ne’ebé ladi’ak. Ita husu took ba ita an, karik kultura ne’e tama mós iha ita nia tempu agora, maibé ita bele muda sei ita iha prinsípiu ida. Tan ne foin-sa’e sira tenke iha kriatividade atu uza nia kapasidade atu deside. Kriatividade nee tenke buka dalan, iha otimizmu no buka hodi hanoin pozitivu nafatin. Ohin sai konvite ida mai ita atu haka’as-an hodi promove no hakiak buat ne’ebé di’ak. Don Bosco dehan, dalan atu sai santu mak halo didi’ak knaar loron-loron ho modu estraordináriu. Valoriza ita-nia hahalok loroloron nian nune’e dalan santidade ne’e bele too mai ita hotu.  Ita husu iha selebrasaun nee ho intersesaun DB nian ita bele kuda iha ita nia fuan hahalok sira be di’ak. Labarik no foin-sa’e hirak ne’e iha kapasidade, nune’e DB fiar iha ita ida-idak. Wainhira ita fila ba uma ita bele lori esperiénsia fatin tolu ida ne’e COLLE: ita nia família no CHIERI mak ESKOLA. IHA VAlDOCCO mak misaun ka animasaun».

Iha momentu agradesimentu nian, Irmán Olga  Belo, koordenadora ba Forum MJS, hatoo agradese wain ba Pe. provinsiál, padre Transfigurasaun Pinto SDB nu’udar reitór komunidade Fuiloro, Irmán Sebastiana Da Costa Soares FMA nu’udar superiora komunidade Fuiloro; nailulik sira ne’ebé selebra misa; Pe Alarico Sarmento sdb, no Irmán Isaura Belo FMA hmutuk ho ekipa sira iha koziña  no ba partisipante hotu MJS tinan ida ne’e nian. Ikus nian husu ba joven sira atu “fila ba uma sai ba familia kampu ne’ebé imi rasik aprende ona durante loron hirak ne’e nia laran.

Forum Movimentu Juveníl Salezianu ida ne’e remata hodi fó nu’udar prezente simbóliku kamizola kampu DB 2015 ba komunidade SDB/FMA Fuiloro. Ikus han hmutuk hafoin fahe malu no ADEUS HASORU MALU MJS TINAN NE’EBÉ SEI MAI. OBRIGADA

(Ines Bartolo Freitas)