Fuiloro – Hahú iha loron 17  Agostu, komisaun  Organizadora Movimentu Juveníl Salezianu (MJS) ba selebrasaun Bisentenáriu Don Bosco nia moris 2015 iha Fuiloro hahú ho preparasaun hanesan, prepara tenda, dekorasaun no buat seluk tan ho entuziazmu boot.  Festa ne’e husi loron 18-21 Agostu.

Iha loron 18 Agostu mak loron dahuluk MJS  nian. Loron ne’e bele dehan katak ekipa ne’ebé responsavel ba movimentu MJS nian  hein ho ksolok partisipante sira husi fatin hotu  ba Selebraun boot ne’e.

Iha lokraik oras tuku 15:00 OTL, hahú simu partisipante sira hodi halo rejistu no entrega ID card , hafoin hatudu fatin ba foin-sa’e feto sira hela iha Komunidade FMA Fuiloro  no mane sira hela iha komunidade SDB Fuiloro. Molok atu hahú selebrasaun Eukaristia ba Abertura nian, Irma Angelita esplika oituan kona-ba kor tolu ne’ebé sei anima iha loron hirak ne’e nia laran. Kor azul  hanaran Chieri, kor metan hanaran Valdocco, kor mean hanaran Colle.

Iha Misa Abertura ne’e padre Manuel Pinto, SDB mak prezide,  hamutuk ho Padre Alarico Sarmento, SDB ho  Pe. Amarianto SDB. Partisipante joven sira hamutuk 350.

Iha omilia padre hahú ho liafuan Benvindo ba foin-sa’e  sira hotu, liuliu ba “ksolok no entusiazmu  ne’ebé lori esperansa ba kualifikasaun ita-nia atividade ne’ebé ita hala’o iha loron hirak ne’e nia laran, hanesan iha leitura ne’ebé dehan:  povo Israel mak Povu ida Maromak nian, ne’ebé Maromak rasik mak hili  nune’e povu ne’e ikus mai hatudu nia konfiansa totál ba Maromak”.

Pe Manuel liga ho Don Bosco nia moris. “Nia mós esperiénsia hanesan ita foin-sa’e sira. Nia mós iha karakter forte liu mak sombong ou buka oin, maibé Maromak hatudu sinál ida ba nia liuhusi mehi tinan sia nian,  ne’ebe Jezús rasik dehan ba nia: haraik an, pasiénsia no domin mak ó bele manán buat aat hotu”.  Nune’e mós, nia hatutan, Ita ida-idak iha frakeza maibé iha loron hirak ne’e ita sei aprende atu sai hanesan Don Bosco hodi moris tuir nia iha prátika hodi nune’e ita bele fahe ba maluk sira ho espíritu foun ne’ebé simu husi Don Bosco durante loron hirak ne’e nia laran.

Iha “buna notte” kalan dahuluk nian Provinsial FMA Irmán Alma Castagna fahe ho foin-sa’e sira hotu ho liafuan: “Ha’u iha privilejiu atu loke Kampu Bosco tanba loron primeiru ha’u loke ho bonoite no taka ho Padre Provinsiál nia bonoite mós, nune’e ami na’in rua hakohak imi hotu. Kampu Bosco ne’e mosu iha eventu barak, hanesan Prezensa Kardeál Pietru ba selebrasaun tinan atus lima kreda Timor nia istória fiar nian”. Ir Alma foti fali Kardeál nia liafuan ne’ebé dehan, ‘Se imi moris iha rai ne’ebé livre, dezenvolve kapasidade hotu ne’ebé imi iha tanba joven barak halo sakrifísiu atu fakar raan atu nasaun ne’e hetan Liberdade’,, “hodi husu pergunta ida: ha’u halo saida ba ha’u-nia rain no ha’u-nia família?”

Haktuir fali eventu MJS mundiál ne’ebe foin hotu loron rua liubá iha Itália, Ir Alma haktuir foin-sa’e ida nia lia-husu ba Madre Jerál kona-ba karakterístika foin-sa’e ne’ebé hola parte iha MJS. Madre Jerál hatoo karakterístika sira tuirmai ne’e:

• Foin-sa’e ne’ebé partisipa mak foin-sa’e normal ida
• Foin-sa’e ne’ebé laran-manas no “apaixonadu” ba Jezús, Don Bosco, Maria no Madre Mazzarello
• Kria relasaun di’ak ho foin-sa’e seluk
• Foin-sa’e ne’ebé hakarak saran nia moris ba sira ne’ebé presiza liu
• Sai evanjelizadór/a ksolok nian

Ikus liu Madre Alma taka ho pergunta tuirmai ne’e: “Imi hadomi Jezús, Don Bosco, Na’i- Feto, no Madre Mazzarello ka lae?

Nune’e madre husu ba foinsae ida-idak atu bainhira fila ba uma, família ka maun alin sira sei haree imi-nia moris lahanesan ona uluk ne’ebé imi seidauk partisipa iha eventu boot ida-ne’e.

(Ines Bartolo Freitas)