Dili – Konsagradu no konasagrada sira husi Dioseze tolu Timor-Leste nian, hetan oportunidade atu hasoru malu ho  Kardeál Pietro Parolin, Sekretáriu Estadu Vaticano nian, ne’ebé husi loron 13-15 Agostu hela iha Dili ba eventu jubileu tinan 500 evanjelizasaun iha Timor-Leste.

Enkontru ne’e halo iha meiudia loron 14 Agostu ho almosu hamutuk, hahú ho resesaun boot, husi estudente sira Canossa nian iha Uma Provinsiál Canossiana iha Becora no loloos taka iha tuku neen loraik iha Katedral, ho selebrasaun eukaristika Na’i-Feto hasa’e ba Lalehan.

Pe. Gabriel Suban SVD, nu’udar Prezidente Konferénsia Superiór/a Maiór sira-nian fó nia diskursu benvindu nian, hodi dehan katak loron-ohin, “loron ksolok no gratidaun nian ba tinan 500 evanjelizasaun nian”.Hanesan Amu-Papa Francisco hakerek ba konsagradu/a sira, ita presiza “hateke ba pasadu ho gratidaun”, ba misionáriu/a lubuk ida ne’ebé saran an ba kauza Evanjellu nian.  Nia mós aprezenta panorama vida konsagrada iha Timor-Leste.  Iha Timor-Leste servisu kongregasaun hamutuk 70: kongregasaun feto nian 52; mane nian 15; Sosiedade Vida Apostólika 3. Maibé kongregasaun 19 mak iha nia estrutura organiza nu’udar provínsia iha Timor.

Depoizde agradese Pe. Gabriel ninia aprezentasaun, Kard. Parolin hateten katak nia sente impresaun boot “la’ós de’it ba númeru relijiozu/a sira iha nasaun ne’e, maibé mós ho númeru kongregasaun sira-nian ne’ebé ida-idak ho ninia karizma serbisu atu harii Maromak nia reinu iha rai ida-ne’e”. Nia hatutaun: “Ha’u hakarak fó parabéns ba imi no agradese imi-nia prezensa iha Kreda ne’ebé riku no bele prodús  fuan abundante”, nia hateten.

Hafoin, Kard. Parolin mós temi Papa Francisco nia  Surat ba Vida Konsagrada iha okaziaun Tinan dedika ba nia: “Iha-ne’ebé iha ema konsagrada, nafatin iha ksolok”, no hatutan kedas ho lia-husu: “Tanba sá?”

Razaun sira ba ksolok nian, ne’ebé Kard. Parolin deskreve mak hanesan tuirmao ne’e:

“Tanba imi deside atu tuir Na’i ho dalan ne’ebé radikál liu, liuhusi konsellu evanjéliku sira”. Nia mós evidensia katak ksolok nia motivu ida mak “hakohak dalan ne’ebé fundadór/a sira trasa ona, ne’ebé hatudu ba uniaun profunda ho Maromak no domin efetivu ba ema seluk”. Hafoin razaun ksolok nian seluk mak “konsagra an tomak ba Maromak iha karidade perfeita”. Loos duni, iha relijiozu/a sira leet iha ksolok tanba “imi hetan duni Na’i no imi hatene katak Nia mak ksolok Evanjellu nian”. Tuir Kar. Parolin, ema ne’ebé hasoru Jezús ninia hahalok sira no moris sai hanesan Ninian. “Ho Jezús Kristu, ksolok nafatin hafutar imi”. Hafoin Kard, Parolin, hateten katak Testamentu Foun nakonu ho istória sira iha-ne’ebé, dixípulu sira, povu, indivíduu, depoizde hasoru malu ho Kristu sira sai nakonu ho ksolok: “Imi tama iha korrente boot ksolok nian ida-ne’e […] Ha’u enkoraja imi atu sai nafatin povu ksolok nian”, nia subliña, nune’e bele dada povu sira ba Maromak nia domin.

Atu remata nia lifuan sira, Kardeál Parolin, husu atu kria espíritu família nian iha komunidade sira, hanesan Don Bosco husu ba salezianu no saleziana sira: “Ksolok tenke hahú nafatin husi ita-nia komunidade sira, ho maun-alin no biin-alin sira imi moris hamutuk bá. Husik atu imi-nia konventu sira, uma relijiozu sira no rezidénsia sira sai uma loloos ho espíritu família nian, kompostu husi membru sira ne’ebé hatene oinsá haksolok ho sira ne’ebé haksolok, nune’e mós tanis ho sira ne’ebé tanis”.

Iha Misa solene Asunsaun Maria Virjen nian, iha omilia, Amu Parolin konvida relijiozu/a sira atu aprende husi Maria, ezemplu dixípula nian: “rona Maromak nia Liafuan no tau iha prátika”.  No iha okaziaun tinan 500 evanjelizasaun nian, Amu Parolin konvida relijiozu/a sira atu “kontinua  sai ba periferia no kontinua minsitériu laran-sadia nian” ba ema sira iha sosiedade nia ninin.