Novisa foun tinan 2015

Dili – Loron 4 agostu, baibain, loron ne’ebé aumenta membru foun iha komunidade Novisiadu. Tanba iha lokraik, tuir tradisaun iha tuku 16.30 hanesan ne’e, iha celebração ba postulante sira ne’ebé iha hakaran nafatin kontinua hatán “Sim” ba Maromak nia bolnu, nune’e sira sei hakat ba iha etapa novisiadu nian.

Iha tinan ida ne’e, iha postulante na’in hat ne’ebé sei sai membru foun iha komunidade novisiadu. Sira mak ne’e: Abelita Martins Babo, Domingas Pereira, Fatima Martins, Veronika da Cruz.

Sira hakarak no ho aten-brani kontinua sira nia dalan formasaun iha novisiadu, tanba sira rona Jezús nia lian ne’ebé dehan : “Aten–brani bá. Ha’u mak ne’e, keta tauk!”. (Mc 6:50b). Jezús nia Liafuan ida ne’e mak sira hili nu’udar lema/motto ne’ebé sei fó korajen no suporta sira iha sira nia hakaran atu saran-an ba Nia.

Sira ne’ebé partisipa iha celebração ne’e mak me. Alexandrina, superiora komunidade Balide, komunidade formasaun etapa Aspirantadu no Postulantadu, komunidade Novisiadu no madre provinsiál, me. Alma Castagna ne’ebé sei entrega Postulante sira ba me. Cecilia del Mundo, mestra novisa sira-nian. Celebração ida ne’e hala’o simplis maibé iha signifikadu b’ot liuliu ba sira na’in hat, tanba hodi tama ba etapa novisiadu signifika sira tama kle’an liután iha esperiénsia moris relijioza nian. Sinál katak sira sai ona novisa mak sira simu medalla ho oin Maria Auxiliadora no iha kotuk ho oin símbolu institutu Filhas de Maria Auxiliadora.

Bazeia iha  leitura (Jer.18:1-6) no evanjellu (Marcos 6:45-52)  ne’ebé sira hili, iha ninia mensajem ba novisa foun na’in hat ne’e, me. Alma foti aspetu rua mak: 1. Inkomprensaun, katak iha buat barak no ita la bele komprende hotu, hanesan akontese ba Apóstolu sira. Maibé maski sei nakukun hela, ita la’o ba oin. 2. Konfiansa, katak badai sana-rai wainhira nia haree sana-rai ne’e la di’ak, nia halo ida tan tuir nia na’in nia hanoin… Hafoin nia hatutan hodi sita fraze “Nia hakbesik sira hodi la’o iha be leten” (Mc.6:48). “Jezús la’o hakbesik ita; ita hotu iha Jezús nia liman; Nia hatene ita atu ba ne’ebé, husu mai ita tenke iha fiar”.

Molok remata ninia liafuan, me. Alma fó empeñu no husu ba novisa foun sira-ne’e buat tolu: 1. Keta ezije atu hatene buat hotu; 2. Manán ta’uk hodi tau konfiansa iha Maromak, iha formadora sira; 3. Nakukun sei la para imi nia dalan, se ida ne’e imi-nia dalan duni.

Celebração remata hodi reza Jezús nia orasaun “Ami Aman”, ne’ebé  hametin liutan tali komuñaun nu’udar família ida de’it. Programa ikus nian, molok fahe malu, hotu ba halo merenda atu fahe ksolok  nu’udar família ne’ebé kontente simu “oan” sira.

PARABÉNS….

(Veronika Kusnadi)