Kazál sira uniaun daruak nian halo parte Kreda
RV – Depoizde fulan ida pauza, Papa Francisco hahú fali, iha kuarta 5 Agostu, iha Sala Paulo VI, katekeze sira iha siklu reflesaun nian kona-ba família. Katekeze ne’e, nia dedika ba “família sira ne’ebé kanek”, hodi temi ho modu espesiál kazál sira uniaun daruak nian.
Papa Francisco ko’alia kona-ba oinsá bele tulun kazál sira ne’ebé sira-nia kazamentu hasoru frakasu no hahú fali uniaun daruak, hodi enfatiza katak sira kontinua halo parte ba Igreja. “Ema sira ne’e la eskomunga ho modu absolutu – la eskomunga sira – no labele trata sira nune’e: sira halo parte nafatin ba Kreda”, Amu-Papa hateten.
Maski konxiente katak separasaun kontradís sakramentu sarani, Kreda nia hateken ba situasaun ida-ne’e nafatin hahú ho fuan ida inan nian, hodi buka ema sira nia di’ak no salvasaun. Hodi observa uniaun daruak hahú husi persesaun oan sira-nian – ne’ebé tuir Amu-Papa mak sira ne’ebé terus liu tan separasaun – urjente liu atu komunidade sira simu ema sira ne’ebé liu husi situasaun sira-ne’e.
“Oinsá ita bele rekomenda ba aman-inan sira-ne’e atu halo buat hotu atu eduka oan sira ba moris sarani, hodi fó ezemplu fiar ne’ebé konvensida no moris nian, se ita hadook sira husi komunidade nia moris? (…) Ita labele aumenta naha-todan seluk ho sir ane’ebé oan sira tenke lori, iha situasaun sira hanesan ne’e”.
Iha realidade sira-ne’e nia oin, Igreja la “insensível” no “baruk”, Papa Francisco dehan. Nia hatutan tan katak, ho bibi-atan sira nia aprofundamentu, buras konxiénsia kona-ba nesesidade ba akollimentu fraternu no atentu ba sarani sira ne’ebé haketak malu no estabelese konvivénsia foun ida.
“Sarani sira hotu simu bolun atu imita Bibi-Atan Di’ak. Liuliu, família sarani sira bele kolabira ho Nia hodi tau matan ba família sira ne’ebé kanek, akompaña sira iha komunidade nia moris fiar nian”.
