Venilale – Hanesan baibain wainhira labarik sira iha orfanatu atu ba halo feriadu, Inan/ Aman sira mai atu akompaña oan sira; Nune’e ohin 29 Novembru 2012, oras tuku 08:00 Família husi labarik sira Orfanatu S. Dominggos Savio mai atu halo enkontru molok atu lori labarik sira ba uma. Enkontru ne’e halao husi irmán Maria Letizia FMA nu’udar koordenadora Jerál Orfanatu nian.

 

Uluknanain irmán Maria aprezenta ba família akontesimentu boot ne’ebé sei halao tinan mai kona ba prezensa FMA nian ne’ebé atu halo ona tinan ba 25 iha rai Venilale; ida-ne’e nu’udar notísia ida ba família sira atu sente hola parte tanba orfanatu pertense ba komunidade dahuluk ida ne’e.

Tema prinsipál iha enkontru ne’e mak atu hakle’an Tinan Fiar nian; ne’ebé konvida ita sarani hotu atu hakle’an no haklaken ita-nia fiar durante tinan ida-ne’e nia laran. Mai ita sarani Fiar mak hanesan “ Odamatan” ba Família Maromak nian, ba vida komuñaun nian ho Maromak TRINDADE no halo ita tama iha ninia Kreda, nakloke nafatin mai ita.  Atu tama ba uma nia laran presiza liu husi odamatan ne’e hahú ho Batizmu; ida ne’e bele kompara mos ho ita sarani nia fiar katak atu koñese Maromak ita presiza iha fiar ne’ebé bele lori ita tama ba mistériu boot Maromak nian hodi deskobre Nia iha ita-nia moris. Nu’udar sarani ita hatene katak Kreda mak nu’udar ita nia inan ne’ebé halibur ita atu bele haboot ita-nia fiar. Amu-Papa Bento XVI fo hanoin ba Relijiozu/a sira atu bele haklaken fiar ida-ne’e, no Amu-Papa husu maka’as mós ba família sira atu kolabora iha misaun ida-ne’e tanba família mak nu’udar Kreda ki’ik ida ne’ebé bele ajuda oan ( Liu husi orasaun, hadomi malu, respeita…………) molok sira atu sai ba li’ur ka sosiedade; se oan sira la simu edukasaun di’ak iha família, katak família rasik, sira mós sei la haburas iha sosiedade nia laran. Hotu tiha enkontru oan sira aprezenta teatru ruma ba família nu’udar sira-nia talentu ne’ebé durante ne’e sira aprende no habras iha Orfanatu. No ikusliu merenda hamutuk no ida-idak fila ba uma too fulan Janeiru tinan oin.