Dili – Segundu Novisiadu mak periodu preparasaun nian besik liu ona ba profisaun perpétua. Iha klima orasaun no reflesaun nian ba hare fali ninia moris iha espiritu Santu nia roman atu bele prepara ninia an diak  liu, atu fó resposta definitiva fidelidade nian ba Maromak iha Institutu. ( const. Art. 98)

Tan ne’e iha loron 21 Jullu ami irman nain 3 : Ir.Alice Gama Filipe, Ir. Elizita Isabel Gonzaga da Silva no Ir. Theresia Katarina Tuto, hahu ami nia segundu novisiadu  iha Comoro – Dili hamutuk ho Ir. Sebastiana Soares nu’udar Vigária Provinsiál. Ami komesa iha loraik hodi hahú ho orasaun inísiu nian. Hafoin Ir. Sebastiana aprezenta esperiénsia segundu Novisiadu nian hodi dehan mai ami  katak :

Segundu Novisiadu mak “Tempu Grasa nian ( orasaun nian) iha ne’ebé ha’u ho ha’u nia Maromak de’it; Halo viajen ba fidelidade no; Deskobre beleza feto Konsagrada nian.

Nune’e mos iha momentu orasaun nian ami lori sanan–rai nu’udar símbolu ami nia moris nian atu Maromak de’it mak bele enxe ho Ninia grasa hotu liuliu grasa fidelidade nian.

 Se ema fó mai hau sanan–rai ida ne’ebé mamuk hodi halo viajen ida do’ok tebtebes saida mak ha’u sei enxe ba sanan–rai ida ne’e?

Ida ne’e mak perguntas ne’ebé fó mai ami atu reflete.

Iha ami idak – idak nia reflesaun ne’ebé ami fahe, ami hateten katak :

Buat ne’ebé ami tenke enxe mak Bé atu fo semangat liu tan hodi kontinua lao ba oin maske sei hasoru foho,rai rahun no loron manas. Bé ida ne’e mak Jezus Kristu rasik be matan rohan laek nian.Sanan rai ne’e mos ha’u tenke kuidadu didiak atu labele fera iha dalan klaran ( ir. Alice).

Buat ne’ebé ha’u tenke enxe mak Bee atu nune’e bele halakon ha’u  nia hamrook no kole wainhira hasoru loron manas,rai rahun  no la’o iha foho.

Espirituál nian ne’ebé ha’u tenke enxe mak Laran metin nafatin iha Maromak , ksolok no esperansa, katak ha’u la la’o mesak maibé iha ema Ida ne’ebé nafatin hamutuk ho ha’u.(ir.Elizita)

Ba ha’u, sanan-rai ida ne’e ha’u lori mamuk de’it maibé ha’u tau matan didiak atu labele fera atu nune’e  Maromak de’it mak bele enxe ho Ninia grasa tomak iha ha’u nia moris . ( ir. Theresia)

Maromak bolu ema hotu- hotu liu- liu sarani sira atu fó sasin  kona ba moris pobreza nian tuir idak – idak nia vokasaun. Maibé nu’udar Konsagrada ne’ebé kesi-an ho votu pobreza tenke halo liu buat ne’ebé sarani bain- bain halo.

Ho ne’e,  loron tuir mai 22 Jullu ami hamutuk ho Ir. Aurora Ramos hodi koalia kona-ba votu Pobreza nian ne’ebé hahú ho “adorasaun Krús nian”. Hodi kontempla Krú ida ne’e fó hanoin mai ami katak Jezús ne’ebé Maromak Oan halo An kiak hodi mate iha krús atu salva ema tomak. Maromak salva ema hodi hili dalan pobreza nian mak Maromak halo An sai ema hodi moris iha ema nia le’et to’o mate mós hanesan ema kiak ida iha krús.

Iha lokoraik ami-nia konferénsia ko’alia kona ba Jezús nia pobreza tuir Evanjellu iha buat tolu ne’ebe hatudu duni katak Jesus moris iha pobreza.

Jezús Maromak Oan halo-An kiak liu-liu iha Ninia moris iha Belem iha balada han fatin.

Jezús fo sasin kona ba moris pobreza nian,mak wainhira hamutuk ho Maria no José iha Nazare durante tinan 30 nia laran nu’udar badaen ai nian.

Jezús haklaken pobreza hodi hanaran “Rahun Diak” ( mat.5 : 1-) durante tinan tolu nia laran hodi hanorin ba Ninia eskolante sira katak kondisaun atu tuir Nia tenke sai kiak iha laran atu Maromak de’it mak sai ita nia rikusoin. Kiak iha liur ne’ebé ema bele hare mak  “husik buat hotu, fa’an ba ema kiak sira hafoin tuir Ha’u mai”

Iha kalan nu’udar bona noite ami hare video badak ida  Madre Teresa Calcuta nian nu’udar sasin pobreza nian. Iha video ne’e madre Teresa dehan  ita tenke kuinese ema kiak idak- idak . Sira ne’ebé kiak ba material ita bele fó material maibé iha mundu ohin loron nian, pobreza boot liu iha mundu mak ema solidaun sira, marjinalizadu sira no ema hewai sira”.

Tema sira ne’ebé ami hetan durante iha ami nia esperiénsia ne’e mak :

• Jezús nia pobreza tuir evanjellu no sarani dahuluk sira nia pobreza.
• Sentidu Teolójiku pobreza nian
• Maria virjem pobreza
• Don Bosco no Madre Mazzarello sira nia sasin pobreza
• Pobreza tuir artigu Konstituisaun
• Igreja kiak ba ema kiak sira ( Amu-Papa nia mensajem)
• Madre Jerál nia sirkulár kona ba pobreza 950

Iha kalan- kalan ami nafatin iha video badak kona ba sasin pobreza nian  nu’udar buona notte ne’ebé tulun ami atu hatene sai solidáriu ho ema kiak sira maibé hanorin ami atu sai sasin pobreza nia iha komunidade no iha misaun nu’udar irman saleziana.

(Theresia, Elizita, Alice)