CN – Pergunta ne’ebé Kreda tomak halo, no mós sai forte iha Sínodu Bispu sira-nian ba Evanjelizasaun Foun, mak pergunta ne’ebé mós halian iha Amu-Papa nia fuan: “oinsá ko’alia kona-ba Maromak iha tempu ohin”.

Iha katekeze kuarta 28 ne’e nian, Amu-Papa hato’o resposta ba interrogasaun sira hasoru nesesidade atu haklaken Maromak nia Reinu “ba fuan sira ne’ebé taka” ita-nia kontemporáneu sira-nian.

Asesu kópia ho lia-portugés

 

Ba Amu-Papa, kondisaun dahuluk atu ko’alia kona-ba Maromak mak rona Nia no komunika buat ne’ebé Maromak rasik komunika. Aleinde ne’e, hatene momoos katak Maromak ne’ebé ita haklaken la’ós Maromak abstratu ida, “ipóteze ida, maibé Maromak konkretu ida, Maromak ida ne’ebé eziste, ne’ebé tama iha istória no horik ha istória; Maromak Jezús Kristu nian nu’udar resposta ba lia-husun fundamentál tansá no oinsá moris.”

 

Tuir Bento XVI, metodolojia anúnsiu nian tenke banati métodu sira ne’ebé Maromak rasik hili atu komunika nia An ba mundu: haraik-an no simplisidade. “Presiza rekupera simplisidade”, Amu-Papa hateten, no fila fali ba anúnsiu nia esénsia: “Liafoun Di’ak Maromak ida nian ne’ebé reál no konkretu, Maromak ida ne’ebé iha interese mai ita, Maromak-Domin ne’ebé sai besik ho ita liuhusi Jezús Kristu…”

Atu ko’alia kona-ba Maromak, Bento XVI esplika, presiza rona no koñese Nia; fó espasu iha simplisidade no ksolok, hodi tau Nia iha sentru komunikasaun nian; utiliza ho sabedouria famíilia nu’udar fatin dahuluk evanjelizasuan nian; no ikusnian, maibé la’ós menus importante, tradús iha moris, jestu, liafuan no hahalok konkretu Evanjellu ne’ebé ita hakarak haklaken.

“Oinsá ita-moris moris iha fiar no iha karidade sai modu ida ko’alia nian kona-ba Maromak ohin-loron, tanba hatudu kredibilidade, realizmu, realidade loos ho ezisténsia ida moris iha Kristu”.

Bento XVI taka katekeze hodi propoin atu Tinan Far nian sai ba ema hotu okaziaun deskoberta nian ba dalan foun, iha nivel pesoál no komunitáriu, atu iha fatin ida-idak Evanjellu sai “sabedouria moris nian no orientasaun ezisténsia nian”.