Ezersísiu espirituál grupu dahuluk FMA TIN 2015

Jakarta – Ezersísiu espirituál mak momentu renovasaun partikulár moris nian (Konst.46) no hanesan Madre Mazzarello dehan, sai momentu atu halakan filafali ahi domin nian ba Maromak. Grupu dahuluk FMA Inspetoria TIN ne’ebé hala’o retiru mak Irmán FMA sira husi Jakarta no Palla (Indonesia) hamutuk na’in sanulu-resin-ida, husi loron 15-22 Jullu iha Lembah Karmel-Cikanyere (Jawa Barat).

Retiru ne’e Pe. Petrus Tukan SDB mak gia ho tema jerál “Maria modelu vida konsagrada nian”.  Loron ida-idak retiru nian iha konferénsia rua ba minutu 30-45. Sub-tópiku sira mak hanesan tuirmai ne’e: Maria modelu vokasaun nian, vokasaun nu’udar mistériu no resposta livre ema nian; Maria orante iha orasaun hahí no saran-an nian; Maria modelu moris nian iha vida komunitária; Maria modelu vida votus relijiozu sira-nian; Maria modelu moris misionária; Maria modelu formasaun nian no Maria modelu vida espirituál nian. Razaun tema ne’e hotu tanba ita sei iha Tinan Vida Konsagrada nian. Konferénsia sira-ne’e hotu fahe ba momentu rua. Iha parte dahuluk pregadór Pe. Petrus foka iha vizaun eh elementu esensiál sira vida konsagrada nian; iha konferénsia daruak nia foka liu ba vida prátika no esperiensiál.

Durante Ezersísiu espirituál ne’e, iha mós Ir Jacinta Gusmão ne’ebé akompaña Irmán sira ho ninia prezensa nu’udar biin, tanba la iha Inspetora no Diretora komunidade nian. Durante kalan mak nia fó “Buona Notte” tradisionál saleziana hodi integra pregadór nia konferénsia sira ho elementu karizmátiku eh salezianidade nian (Madre Mazzarello no Don Bosco nia moris nian).

Tuir Irmán sira ne’ebé partisipa retiru ne’e, sira sente katak pregadór lori duni sira atu hateke ba sira nia moris konsagrada iha tinan ne’e no lori sira atu haka’as an atu halo projetu pesoál moris nian ne’ebé lori ba dalan renovasaun nian.  Iha loron ikus Irmán sira simu mensajen husi Madre Mazzarello (Surat 41), atu “sai nakonu ho laran-manas”, atu “sai ezemplu obediénsia nian, karidade no kumpre didi’ak iha buat hotu”. Iha Surat ne’e Madre Mazzarello mós husu atu “Iha atensaun di’ak no labele husik mate ahi ne’ebé Na’i halakan iha fuan” hodi “hanoin katak lato’o atu halo rezolusaun furak, maibé tenke tau iha prátika, se ita hakarak atu Na’i prepara kaebauk kmo’ok ida ba ita iha Lalehan”.

 Moris foun no impulsu foun iha dalan santidade nian!