Foin-sa’e sira ne’ebé mai husi komunidade oioin, atu tui enkontru kona-ba orientasaun vokasionál ba sira ne’ebé hotu ona sira nia eskola sekundária no hakarak atu halo esperiénsia voluntaridu iha komunidade ida-idak (orfanatu Laga, orfanatu Venilale, no eskola MA, Dili).

 

Venilale – Foin-s’ae feto sira hamutuk nain 18 mai husi distritu oioin. Iha loron 24 Novembru sira hahú sira-nia  retiru ho Pe. Andre Delimarta SDB ne’ebé ko’alia kona-ba VOKASAUN ita ema nian; vokasaun mai husi Maromak  hahú husi ninia kriasaun liuliu wainhira ita sei iha ita inan nia knotak. Maromak bolu ita ema iha parte tolu: Moris nu’udar família, moris mesak no moris Relijiozu/a.

Maromak fó mai ita ida-idak karaterístika ho espíritu atu : hadomi, hanoin / reflete no sakrifika an hodi hatán ba Maromak nia bolun. Tanba Maromak hakarak fahe Ninia domin gratuitu mai ita ema no fó liberdade mai ita atu haree no hili. Maromak fó mai ita mistériu salvasaun nian katak; vokasaun hanesan grasa ida mai ita; nune’e loron ba loron ita kontinua halo diálogu ho Maromak atu ita bele deside lolos kona-ba ita -nia vokasaun. Maromak wainhira bolu ita dalan Nia dalan Nia nafatin tau matan mai ita iha ita-nia dalan vokasaun nian.

 

Iha lokraik Madre Paola marka nia prezensa hodi hato’o benvinda no dehan ba sira katak vokasaun mak nu’udar grasa boot ida husi Maromak nune’e imi keta tauk atu hatán ba Maromak nia bolun; ita ida-idak presiza iha korajen atu deskobre no hatán ba vokasun ne’e.

Tuir mai sira iha enkontru pesoál ho irmán Paola Battagliola FMA, hodi fahe sira-nia hakaran atu halo esperiénsia iha komunidade ka lae?

Iha loron 25 Novembru irmán Paola ho irmán Ana Cesaltina akompaña sira ba vizita orfanatu, ba bee-matan Buihunu no la’o ba Waibua atu deskobre uituan natureza nia furak iha rai Venilale. Ba momentu ikus nian  iha sira-nia enkontru irmán Paola aprezenta ba sira komunidade ne’ebé sira sei bá halo esperiénsia. Tuir mai han meiudia hamutuk no momentu di’ak atu agradese ba irmán Paola no mós ba komunidade ne’ebé simu sira ho ksolok. Hafoin iha lokraik sira ida-idak fila ba sira-nia uma hodi prepara an atu ba halo esperiénsia iha fatin ne’ebé sira hatene ona.