Baucau – Bazeia ba selebrasaun tinan 500 evanjelizasaun fiar katóliku nian iha Timor, grupu oratório husi sentru Diwake, Teulale no Infânsia misionária hamutuk ho inan-aman balun, no  animadores husi grupu tolu ne’e halo peregrinasaun hodi halo prosesaun husi gruta Santo António to’o katedrál Baucau.

Atu bele manán induljénsia plenária, semana ida molok halo peregrinasaun grupu oratório sentru Diwake, Teulale no infânsia misionária halo preparasaun liu-liu prepara hodi f’o fórmasaun ba labarik sira atu komprende objetivu husi peregrinasaun no kondisaun sira atu bele manán induljénsia plenária.

Iha loron Domingo 19-7-2015 grupu sira husi oratório Diwake, Teulale no infânsia misionária parókia St. António Baucau halo peregrinasaun atu manán induljénsia plenária. Peregrinasaun hahú iha gruta St. António to’o mai iha katedrál Baucau. Pergrinasaun ida ne’e hahú ho selebrasaun abertura nian ho orasaun ne’ebé ispetoria prepara ona.

Iha momentu abertura nian aproveita mós hodi  konta istória oinsá portugues sira tama mai iha Timor hodi lori fiar katóliku mai iha ita nia rai. Hafóin kontinua ho prosesaun hodi reza no kanta to’o iha katedrál.  Prosesaun la’o diak teb-tebes. Maske loron manas, labarik hotu partisipa ho espíritu orasaun no sakrifisiu  hodi reza no kanta. Iha peregrinasaun ida ne’e katekista delega  mós seguransa parókia nian atu  tulun animadór sira hodi  fó asistensia ba labarik sira durante prosesaun tanba prosesaun liu husi dalan públiku  nune’e movimentu barak ba mai. Baihira prosesaun to’o  iha igreja katedrál kontinua kedas hodi halo selebrasaun penitensiál,  hafóin pe. Palomo pronto kedas iha konfesionário atu  fó atendimentu ba labarik sira.

Labarik hotu-hotu iha interese makás ba sakramentu konfesaun nian nune’e kuaze oras rua nia laran padre atende labarik inan-aman no animadór sira ne’ebé konfesa. Buat ne’ebé interesante tebes mak bele haree katak inan-aman, animadóres no labarik hotu ne’ebé halo ona primeira komuñaun fó importansia duni ba sakramentu konfesaun. Sira hakbesik-an ba sakramentu ida ne’e ho espíritu orasaun no fiar.  Depoizde konfesaun padre kontinua kedas ho bensaun finál. Molok bensaun finál reprezentante inan-aman husi grupu oratório no infânsia sunu lilin husi lilin páskua nian hafóin fahe ba labarik ida-ida no kontinua kedas hodi reza hamutuk kredo atu hafoun fali fiar sarani ne’ebé ita hetan. hafoin taka ho bensaun finál husi Pe. Palomo.

Hotu tiha grupu infânsia misionária sira konvida oratorianu sira husi sentru rua atu ba hamutuk iha salaun parókia nian atu merenda hamutuk no mós hatudu atraksi ne’ebé grupu ida-ida prepara. Buat hotu la’o diak tanba  iha kolaborasaun makás husi parte labarik sira, animadór, inan aman no mós amu Paroko ne’ebé pronto nafatin atu suporta atividade ida ne’e.

Labarik hotu hotu kontente tanba eventu ida ne’e bele tulun sira atu bele hetan grasa liu-liu grasa perdaun nian husi Maromak.

Entrevista badak ne’ebé halo ho labarik Guilermina (oratoriana Teulale) hateten katak “nia kontente teb-tebes tanba ho peregrinasaun ida ne’e nia simu grasa husi Maromak no tulun nia atu haklean liutan nia fiar sarani. Nia akresenta mós katak nia kontente tanba haree nia kolega hotu-hotu hakbesik-an ba sakramentu konfesaun. Ida ne’e mak halo nia orgulho. Nia mós agradese ba nia kolega sira ne’ebé ho laran luak konvida sira atu merenda hamutuk no haksolok hamutuk nu’udar bin-alin”.

Nune’e mós komentáriu husi labarik Efigénia Cardoso ( infânsia misionária) hateten katak” peregrinasaun ida ne’e oportunidade furak ne’ebé nia esperiensia. nia kontente tanba tuir grupu hirak ne’e lori nia hakbesik liutan ba Maromak hodi hetan nafatin bensaun no tulun. Nia agradese mós ba atividades sira ne’ebé madre sira halo hodi envolve mós sira iha laran ”

Reprezentante inan – aman Sra. Joaquina hateten katak “nia agradese tebes nia oan tama grupu infânsia tanba ho ida ne’e dada mós inan-aman atu partisipa eventu sira nebe importante no husi oan sira bele dada ami inan-aman ba Maromak no aprende atu haklean ami nia fiar ba Maromak. Nune’e laos deit ami mak tulun sira maibé sira mós tulun ami iha dalan fiar nian ”

Animadora Angela mós fó nia komentariu katak nia kontente tebes hodi haree labarik hotu partisipa ho ativu maske loron manas liu maibe haree  sira la kole no oin kontente nafatin. Husi sira ami animadór sira mós aprende atu hatene halo sakrifisiu ho oin midar nafatin.

Ida ne’e mak espresaun husi partisipante sira ne’ebé fó sira nia hanoin no observasaun. hein katak ho programa ida ne’e tulun duni labarik sira no liu-liu atu  bele hetan grasa ne’ebé sira presiza. Husi ita nia parte ita tenke kreativu iha ita nia atividades pastoral nian hodi tulun labarik sira atu bele hakbesik-an ba Maromak no liu-liu bele valoriza sakramentu sira no mós selebrasaun importante sira kreda nian.

OBRIGADA WAIN BA EKIPA NE’EBÉ PREPARA MATERIÁL  BA PEREGRINASAUN NIAN. Maromak haraik bensaun wain ba ita hotu…………..

BOAS FESTA BA TINAN 500 EVANJELIZASAUN FIAR NIAN IHA TIMOR……………

Obrigado ba misionáriu/a dahuluk sira…

(Albina do Carmo)