Venilale – Durante tinan tolu ona mak Provínsia TIN halo preparasaun ba aniversáriu FMA nia prezensa ba tinan 25, bainhira irmán salezian na’in tolu tau ain iha Venilale iha loron 1 Outubru 1988. Tema ba selebrasaun ne’e mak “Maria halo buat hotu”, katak Maria mak bá uluk molok nia oan-feto sira no loke dalan ba sira, nune’e mós akompaña sira iha misaun iha Timor-Leste no Indonesia durante tinan 25 ne’e nia laran.

 

Festa nia tutun sei hala’o iha fulan Outubru 2013 no ba ne’e maka ohin, 24 Novembru 2012, membru no kolaboradór balun Família Saleziana nian hamutuk ho FMA sira halibur hamutuk iha komunidade Santa Maria Mazzarello, Venilale atu fahe ideia no fó proposta kona-ba selebrasaun espirituál no festividade ba okaziaun furak ne’e. Objetivu mak gratidaun ba Maromak, ba buat kmanek nia halo iha ita, hanesan Maria rasik haklaken iha ninia Magnificat. Membru sira ne’ebé ohin marka prezensa mak Ir Paola, Ir Aurora, Ir Alma, Ir Olga, Ir Jacinta Gusmão, señor Aleixo, señor Cipriano, Padre Basílio, señora Esperança, señora Teresa Cunha, señora Saturnina. Membru balun ne’ebé hetan konvite la konsege marka prezensa tanba impedimentu serbisu nian.

Aleinde forma komisaun, subkomisaun no sesaun sira, durante enkontru grupu fó sujestaun atu iha preparasaun espirituál bele lori Na’i-Feto Tulun-Na’in ida uma dahuluk nian, katak ida ne’ebé uluk tau iha komunidade Maria Auiliadora Venilale, iha peregrinasaun ba komunidade hotu tuir data hari’in nian. Iha tempu Maria nia vizita fó atensaun ba enkontru formativu, retiru, ba grupu kategoriál oioin, liután ba família, tanba família mak iha knaar atu eduka foin-sa’e sira. Peregrinasaun sei remata hodi bá Na’i-Feto Auxiliadora iha Ariana. Husi parte foin-sa’e sira-nian, tuir irmán Alma, sira husu atu halo kampu marianu, nivel nasionál, atu hakle’an liután Maria nia dalan fiar nian no ninia kooperasaun iha obra salvasaun Kristu nian.

Ida-ne’e mak enkontru dahuluk, no enkontru tuirmai marka tiha ona ba loron sábadu, 5 Janeiru 2013. Iha enkontru mai sei klarifika komisaun, subkomisaun no sesaun ida-idak nia knaar no haree liután saida mak iha konkretu bele halo hodi envolve liután membru hotu Família Saleziana nian prezente iha Timor-Leste.