Dili – Besik daudaun ba konkluzaun selebrasaun tinan 500 Evanjellu tama iha Timor no Bispu sira Timor-Leste nian prepara hela testu ida ne’ebé hakarak sai hanesan surat ida husi Konferénsia Episkopál atu marka eventu ne’e. Loloos dokumentu ne’e hakarak sai “ponto de chegada” ida tinan 500 evanjelizasaun nian, maibé tanba la biban, nia sai fali “ponto de partida” ba “jerasaun foun”. Reflesaun ne’e prepara husi ekipa ida forma husi dosente sira husi Institutu Filozofia no ICR (Instituto Ciências Religiosas”. Molok publika dokumentu ne’e, ohin, 1 Jullu 2015, Bispu no nia ekipa konvoka Superiór/a sira Kongregasaun relijioza sira-nian no amlulik sira husi dioseze tolu ne’ebé halo parte konsellu ekonómiku atu fó sira-nia observasaun no sujestaun ruma ba obra ne’e.

Testu nia títulu tuir ekipa redasaun nian mak “Timor-Leste ohin no doutrina Igreja nian”. Kapítulu sira hamutuk lima: 1) Leitura kona-ba Timor-Leste husi perspetiva istórika; 2) Karakterístika sira Povu Timor nian; 3) Situasaun sosiupolítika, ekonómika no kultura iha Timor-Leste; 4) Kreda nia lian; 5) Liña asaun nian.

Maski konvidadu/a sira atu fó apresiasaun la iha testu iha liman, sira iha interese boot atu fó sira-nia observasaun no ativu tuir buat ne’ebé bele hodi hato’o observasaun sira. Tanba objetivu obra nian mak halo reflesaun ida kona-ba pasadu, hodi haree dezafiu sira ohin nian no Kreda nia resposta ba situasaun sira atuál hodi hateke ba futuru mosu sujestaun uluknanai barak atu muda forma testu nian husi “carta pastoral” ba “orientasaun”, “reflesaun’.

Hafoin, mai mós sujestaun sira atu muda títulu hanesan “Hateke ba Timor”; “Timor iha evanjelizasaun horisehik, ohin no aban”; “Hateke ba Timor ho matan fiar nian”; “Timor iha dalan evanjelizasaun nian”; “Timor depoizde tinan 500 evanjelizasaun”…  Haree ba karákter dokumentu nian, asembleia propoin mós subtítulu nu’udar “Reflesaun Bispu sira Timor-Leste nian iha naroman Evanjellu nian iha okaziaun tinan 500 evanjelizasaun nian”.

Partisipante sira mós sujere pontu ruma atu inklui iha testu liuliu kona-ba kapítulu 3, tanba problema balun ne’ebé mosu iha Timor-Leste la hetan énfaze iha testu laran hanesan tratu umanu, prostituisaun, meiu ambiente… aleinde tau atensaun ba ortografia.

Iha kestaun ida mosu husi partisipante mós kona-ba iha-ne’ebé Kreda Timor nia retratu iha époka horisehik no ohin nian.  Nune’e, sujere tiha atu Kreda mós halo ninia auto-krítika, atu salienta katak nia mós moris iha situasaun ne’ebé nakukun no halo nia dalan konversaun nian.

Pontu ida tan mosu iha asembleia mak atu inklui Maromak nia Liafuan ne’ebé sai hanesan inspirasaun ba Kreda nia dalan evanjelizasaun nian durante nia istória iha tinan 500.

Ikusmai, partisipante sira mós husu atu molok sai publikasaun ne’e, Bispu sira hakerek surat pastoral ida atu aprezenta ho modu sintétiku konteúdu reflesaun livru ne’e nian, hodi prepara sarani sira no Timor-oan hotu ba eventu tutun Selebrasaun tinan 500 Evanjellu tama iha Timor.