Baucau – Husi loron 18 – 21 Juñu, komunidade FMA Baucau simu Ir Alma Castagna, provinsiál FMA TIN iha okaziaun ninia vizita kanónika. Durante vizita ne’e, Ir Alma iha oportunidade atu hasoru mós komunidade edukativa no Família Saleziana, leigu/a sira, animadór/a sira oratóriu no grupu Infánsia Misionária nian.

Loron 20 Juñu mak loron ba Komunidade Edukativa no Família Saleziana nian. Irmán FMA sira, inan-aman sira, animadór/a sira, ADMA no Antigas Alunas sira halibur hamutuk hodi halo enkontru formativu ida ho tema “Maromak nia Liafuan sai kritériu ba moris”. Atu aprezenta importánsia Maromak nia Liafuan nian, Ir Alma uza Maromak nia Liafuan rasik foti husi Ex 16,2-4.12-15, ne’ebé ko’alia kona-ba istória Povu Israel la’o iha rai-fuik no Maromak haraik ba sira ai-han loroloron ho maná. Iha istória ne’e, Maromak husu atu Povu loroloron ba hili ai-han Maromak haraik ba sira no ba uma-laran, no labele foti liu buat ne’ebé presiza.

Kompara ho ita-nia Menu loroloron nian, Maromak mós oferese Menu Liafuan nian mai ita loroloron, hanesan ita hetan iha kalendáriu litúrjiku. “Ne’e mak Menu ne’ebé Maromak rasik prepara ba ema ida-idak, Liafuan ne’ebé loke loron, ne’ebé fó ritmu ba ain-hakat sira”, atu fó kbiit ba ita-nia dalan.

Oinsá han ai-han Maromak fó ne’e? Kontinua reflesaun ne’e, Ir Alma hateten: “Labele lee ho distrasaun, maibé tau an tomak ho neon no laran iha pasajen ne’e (se ha’u distraida ha’u bele nisik), saboreia nia neineik-neineik, lee ho kalma, hanesan foin lee ba dala uluk”, hanesan Na’i-Feto halo. Liafuan ne’ebé ita han tama iha raan, to’o ba liman sira, ain sira… iha jestu ida-idak, nune’e hahalok ida-idak ita halo nia bee-matan mak Liafuan Maromak nian. “Bainhira ha’u halo nune’e, Liafuan sai kritériu dixernimentu nian, pontu referénsia nian ba hilin hotu”.

Ir Alma fó pergunta atu reflete no fahe iha grupu kona-ba oinsá, grupu ida-idak halo atu Maromak nia Liafuan sai ai-han ba sira-nia moris. Serbisu tiha iha grupu, sira fahe ba grupu tomak sira-nia empeñu atu lee, reflete, moris tuir Maromak nia Liafuan, hafoin fahe Maromak nia Liafuan ba maluk sira.