RV- Lutu iha família mak tema katekeze Papa Francisco, iha kuarta 17 Juñu. Amu-Papa destaka katak fiar fó hikas esperansa família sira-nian ne’ebé moria situasaun terus nian.

Papa Francisco fó hanoin ba sarani sira katak mate mak esperiénsia ida ne’ebé kona família hotu, maibé maski nia mak realidade ida halo parte vida, maibé ema nunka haree buat ne’e nu’udar naturál. “Lakon oan-mane eh oan-feto ida hanesan tempu ne’e oara tiha, Loke fali kuak ida ne’ebé tolan tiha pasadu no futuru mós”.

Download

Amu-Papa dehan katak mate iha família hanesan kuak metan ida ne’ebé loke iha família sira nia moris no sira la hatene fó esplikasaun ba buat ne’e, hodi to’o, dalabarak, atu fó kulpa ba Maromak. “Bainhira ema, ha’u la entende, ha’u hirus Maromak, ko’alia aat [blasfémia]. (…) Maibé hirus ne’e mak buat ruma mai husi terus boot, lakon oan-mane ida, oan-feto ida, aman ida, inan ida, ida-ne’e akontese kontinuamente iha família sira”.

Mate fízika iha mós nia kolega sira, Amu-Papa dehan, ne’ebé dalabarak, aat liufali mate: ódiu, inveja, foti-an, karak-teen… Iha sínteze, mundu nia salan serbisu ba mate no halo nia  haterus lni injustu liután. Maibé, iha Maromak nia povu, família barak hatudu katak mate la iha liafuan ikus, no ida-ne’e mak “hahalok fiar” [acto de fé] loloos ida, Pap Francisco deklara.

“Kadavés família ida iha lutu, hetan kbiit atu persevera iha fiar no domin ne’ebé halo sira sai ida de’it ho ema sira ne’ebé hadomi ita, nia impede husi agora kedas atu mate domina buat hotu”.

Amu-Papa husik konsellu ida kona-ba oinsá enfrenta situasaun lutu nian: ho fiar no ho serbisu boot liután domin nian. “Iha fiar, ita bele konsola malu tan hatene katak Na’i manán mate dala ida ba nafatin. Ita-nia maluk doben sira la lakon iha nakukun buat mamuk nian, Esperansa asegura ita katak sira iha Maromak nia liman laran, liman di’ak no forte”.