Fuiloro –  Enkontru animadór/a ne’ebé hala’o iha zona Lospalos no Fuiloro iha kloron 13 fulan Juñu 2015, hetan partisipasaun másima husi animadór/a 135 ne’ebé partisipa ho entuziasmu iha Formasaun ida ne’e.  Iha primeira parte ba formasaun nian nian padre Abrão mak ko’alia kona ba Orasaun iha Don Bosco nia moris. Nia sublina buat tolu ne’ebé importanten iha Don Bosco. Don Bosco mak ema ida orasaun nian, iha ninia servisu hotu ba foinsa’e sira nia halo iha klima orasaun nian. Maski hamutuk iha Pátii mós sai nu’udar orasaun ida. Padre mós temi kona ba Airin 3 tuir Don Bosco: Sakramentu Eukaristia mak hun no centru ba moris sarani nian. Ita sai nu’udar be-matan salvasaun nian.  Maria mak inan no protector ne’ebé nafatin akompanya nia oan sira iha momentu hotu. No ikus liu mak Domin boot ba Santu Padre mak nu’udar Kristu nia ssaseluk iha mundu ne’e.

Iha segunda parte irmán Angelita hato’o kona ba Orasaun tuir Madre Mazzarello. Tuir Madre Mazzarello, orasaun ne’e bele halo halo iha fatin naran deit  maibé ho intensaun no motivasaun ne’ebé loos. Iha Igreja, Toos, hamoos uma, fase roupa, tein, suku  ka naran fatin ida. Orasaun mak esperiénsia uniaun ho Maromak, linguajem klamar nian, orasaun hanesan kilat ida, kontemplasaun loroloron, forsa ne’ebé unifika. No nafatin agradese. Ikus  nian  taka ho animadór/a nia karakristika ne’ebé fahe ba sira jornál atu tesi halo sai roupa. Objetivu mak atu animadór/a sira hatene valór servisu hamutuk iha sira nia knaar nu’udar animadór/a. Hafoin taka ho orasaun no merenda.