Editoriál: Maria orienta ita ba Jezús

Tinan 200 ona (iha 1815) mak ba dala uluk selebra Solenidade ba Maria Auxiliadora, loron 24 Maiu ida. Data ne’e tanba momentu
istóriku ida iha Kreda: libertasaun Papa Pio VII husi dadur iha Napoleão nia ukun. Finalmente nia tama Roma iha 24 Maiu 1814 no tan ne’e Amu-Papa ne’e, iha 24 Maiu 1815, dekreta loron festa Maria Auxiliadora.

Maibé la’ós de’it kontinjénsia istórika sira atu determina Don Bosco nia hilin. Nia sente katak títulu ne’ebé nia hili adekuadu atu esprime ninia agradesimentu ba Virjen ba “tulun” barak nia simu no, hamutuk, atu invoka ninia protesaun ba Kongregasaun ne’ebé foin moris. Aleinde ne’e iha Don Bosco iha énfaze pastorál no pedagójika forte: Maria mak tulun iha dalan moris nian atu manán salan nia atake sira, atu sai livre husi forma oioin aat nian (espirituál, morál no fíziku) no liuliu atu atua buat di’ak.

Tan ne’e, mak ba Maria Auxiliadora, nia dedika monumentu rua ninia gratidaun: monumentu fatuk, katak Bazílika Maria Ausiliatrice iha Torino (1868); monumentu moris Figlie di Maria Ausiliatrice / FMA (1872) sira ne’ebé oras ne’e namkari iha nasaun 95. Monumentu rua ne’e Na’i-Feto rasik mak hakarak hanesan haktuir iha Don Bosco nia mehi profétiku sira.
Ba Don Bosco, Maria mak halo buat hotu.

Mai ita hametin devosaun loos ba Maria tuir S. João Paulo II nia konvite: “Horik iha Maria nia eskola, rona nia lian, tuir nia ezemplu sira. Hanesan ita rona husi Evanjellu, Nia orienta ita ba Jezús: “Halo buat ne’ebé Nia dehan ba imi” (Jo 2,5). No hanesan uluk iha Caná Galileia nian, nia lori ba nia Oan-Mane ema sira nia difikuldade
sira, hodi hetan husi Nia grasa hotu ita hakarak. Ita harohan ho Maria no liuhusi Maria. Nia Maromak nia Inan no ita-nia inan”