Sua Ex.cia dr. Rui Maria de Araujo, Primeiru ministro ho komitiva tomak!

Rev.do Pe. Virgílio do Carmo da Silva; Excelentíssima Srs. Vice ministra da Educação, Sra. Dulce de Jesus Soares; Ex.ma Sra. Secretária do Estado Arte e Cultura, Sra. Maria Isabel de Jesus Ximenes.

Ami haksolok tan ita boot-nia prezensa iha ne’e.

Eskola ida ne’e nia istória bele sai íkone ba ita hotu: eskola “Maria Auxiliadora” hahú iha tinan 1998: loron-loron irmán na’in 3 husi komunidade Balide nian, mai atu loke no hanorin iha eskola ida ne’e. Liu tiha referendum, ita hotu sei hanoin situasaun manas oinsá, no tanba eskola taka, irmán sira deside atu hela iha Balide no la mai atu loke eskola. Tan ne’e, bainhira milisia sira liu no hetan uma mamuk, sira sunu mutuk buat hotu. Maski nune’e, bainhira governu UN husu atu loke kedas eskola, irmán sira hahú fali hanorin iha liur, tanba aula la di’ak. Forsa australiana no governu UN tulun ami atu hari’i fila fali eskola no uma ba irmán sira, no durante tinan hirak ne’e, alunu sira sai barak ba daudaun to’o momentu ne’ebé, maski fahe ba grupu dader no grupu loraik, aula la to’o no eskola presiza halo tan aula sira ne’ebé ita boot sira bele haree iha ha’u nia kotuk.

Tansa ha’u dehan katak bele sai íkone ba ta hotu?

Uluk nana’in tanba esperiénsia ida ne’e hanorin katak situasaun sira, ne’ebé karik ita hanoin aat, loloos bele sai dezafiu, oportunidade atu reflete no halo buat ruma di’ak liu. Se irmán sira, sunu tiha eskola, deside atu husik no hala’o atividade seluk, oras ne’e ita la tuur iha ne’e.

No bainhira ema ida, grupu ida, kongregasaun ida maibé mós governu ida buka ema nia di’ak, nia sei hetan dalan atu to’o ninia objetivu, ka, di’ak liu, Maromak sei haraik Ninia tulun, sei haroman situasaun sira atu hetan solusaun ba buat ne’ebé loos.

Don Bosco, iha livrinhu kona-ba Sistema Preventivo, ko’alia kona-ba edukadór nu’udar ema ne’ebé “konsagra an” ba nia alunu sira nia di’ak, tan ne’e nia prontu atu hasoru problema oinoin, kolen oinoin atu manán ninia objetivu, katak ninia alunu sira nia edukasaun sivil, morál no sientifika.

Ami agradese benfeitor sira hotu, liuliu itaboot sira ne’ebé ohin halibur iha ne’e, tanba buat ne’ebé Don Bosco hakerek la vale de’it ba irmán sira, maibé ho ita boot sira nia kolaborasaun no kontribuisaun, imi mós partisipa ba Don Bosco no Madre Mazzarello nia misaun. Tan ne’e, dala ida tan ami hakarak agradese Primeiru Ministro, dr. Rui Maria de Araujo ho ninia Gabinete ba tulun ne’ebé fó ba gedung/uma no ba kadeira eh mejina ne’ebé foin simu.

Iha irmán sira hotu Inspetoria Maria Mazzarello nian, ha’u hato’o obrigada barak!