CN – Sá de’it dalan atu koñese Maromak? Ne’e mak tema katekeze ne’ebé Amu-Papa realiza iha Sala Paulo VI, iha Vaticano, kuarta horisehik, loron 14.

Santu-Padre temi dalan báziku tolu: mundu, ema no fiar. Konxiente katak iha mundu eziste risku atu desvia ema husi dalan sira, Bento XVI destaka faktu katak Maromk nunka kole atu atu buka ema, basá hadomi nia.

Asesu kópia ho lia-portugés

 

 

“Iha dalan ruma ne’ebé bele loke ema nia fuan ba koñesimentu Maromak nian, iha sinál ruma ne’ebé lori ba Maromak. Konserteza, dala ruma ita hetan risku aru husik mundu nia naroman halo nakukun dalan, no la iha kbiit atu lee sinál sira ne’e. Maski nune’e, Maromak la kole atu buka ita, tanba hadomi ita”.

Amu-Papa fó hanoin, katak ain-hakat dahuluk nafatin Maromak nian, hodi bá uluk molok ema nia inisiativa. “Nia mak halo ita tama iha intimidade ho Nia, hodi hatudu no haraik mai ita, grasa atu bele simu revelasaun iha fiar”.

Refere ba dalan tolu ne’ebé lori ba deskoberta Maormak nian, Bento XVI destaka katak ida mak mundu duni, katak, hatene kontempla ho matan moris kriasaun. Dalan daruak mak ema. Amu-Papa fó hanoin Santu Agostinho nia fraze ne’ebé dehan katak  “Maromak besik liu ha’u duké ha’u rasik besik ba ha’u-nia an (kf Confessioni III, 6, 11)”. Iha ne’e mós ema iha risku atu lakon iha mundu ohin nian, ninia kapasidade atu hateke ba nia an rasik nia laran. Nu’udar dalan datoluk, Bento XVI destaka fiar. “Fiar mak enkontru ho Maromak ne’ebé serbisu iha istória no konverte ita-nia moris loroloron, hodi nakfilak ita-nia mentalidade, juízu valór sira-nian, hilin no asaun konkreta sira. Fiar la’ós iluzaun ida, halai husi realidade, buka subar an, sentimentalizmu, maibé implikasaun moris tomak nian no anúnsiu Evanjellu nian, Liafoun-Di’ak ho kbiit atu liberta ema tomak”.

Ikusmai, Santu-Padre destaka katak sarani ida ne’ebé fiél ba Maromak nia projetu maka dalan privilejiadu ida ona ba sira ne’ebé moris iha indiferensa ka laran-rua kona-ba ezisténsia rasik ka hahalok sira. Ida-ne’e husu atu ema ida-idak sai transparente liután iha ninia sasin fiar nian, hodi purifika nia moris rasik atu sai hanesan ida Kristu nian”.