Dili – Iha loron 10 Novembru 2012, irmán juniora na’in sanulu-resin-hitu halo enkontru formasaun ho irmán Paola ho tema “moris espirituál nu’udar esperiénsia”. Ida-ne’e mak tema ikus ba tinan pastorál 2011-2012. Iha ninia diskursu irmán Paola fó enfáze kona-ba mediasaun sira ne’ebé tulun iha moris espirituál: Maromak nia Liafuan no Konstituisaun sira. Maromak nia Liafuan no Konstituisaun mak hanorin ita atu lee mundu nia istória, Kreda nia istória, Institutu no komunidade nia istória nune’e mós istória pesoál nu’udar istória salvasaun nian. Hodi Espíritu nia roman mak ita bele hala’o moris espirituál, katak moris iha Espíritu no pertense ba Na’i. Atensaun ba Espíritu mak bele halo ita dixerne ita-nia moris nia diresaun, haree rezisténsia sira ne’ebé hapara maturasaun atu forma an rasik tuir Kristu.

Durante tempu reflesaun, irmán sira reflete kona-ba sira-nia relasaun ho Na’i, haree se “Nia hanesan duni Na’i ka hanesan estranjeiru ida”  no mós sira-nia relasaun ho Konstituisaun “nu’udar regulamentu estéril ida no folin-laek” ka nu’udar dalan ne’ebé lori ba moris espirituál loos. Iha sira-nia sharing sira fahe mós kona-ba rezisténsia pesoál, rezisténsia iha komunidade no rezisténsia iha apostoladu. Tuir irmán sira rezisténsia ka obstákulu ne’ebé sira hetan iha nivel pesoál mak individualizmu no egoízmu, ka la mate ba hakaran rasik, mantein ideia rasik no konfiansa-laek ba superiora sira. Difikuldade iha nivel komunitáriu mak la hatene halo diálogu no korresaun. Iha nivel apostoladu nian mosu fali de’it inkapasidade atu sai kriativa iha apostoladu no aspetu seluk ladún iha kolaborasaun iha komunidade.

Molok enkontru remata irmán Paola husu ba sira sujestaun ba enkontru formasaun sira tinan mai. Grupu rua husu atu hakle’an kona-ba Fiar hodi la’o hamutuk ho Tinan Fiar nian no hakle’an dokumentu sira Kreda nian. Grupu ida husu atu iha semináriu mós psikolojia nian atu bele koñese liután an rasik.

Juniora sira-nia liafuan ikus mak “obrigada barak ba madre Paola ba liafuan kmanek sira no komunidade Divina Providénsia ne’ebé fó fatin no ai-han ba ami iha loron hirak ne’e”.