Iha istória Kreda nian, Maromak nia Povu hodi hanoin Maria nia liafuan sira: “Husi otas ba otas ema sei haklaken rahun-di’ak mai ha’u basá Maromak Kbiit-na’in halo di’ak oioin mai ha’u” (Lc 1, 48) no hodi reflete Na’i-feto nia grandeza no ninia kooperasaun iha planu salvasaun nian, lori Povu ne’e atu hariku Inan doben ne’e ho títulu sira, ne’ebé hatudu konfiansa no domin husi sira  ba nia Inan.

Iha kriasaun mundu nian, feto dahuluk, Eva, atrapalla Maromak nia planu orijinál, no lori dezorden ba natureza, ne’ebé ohin ita hanoin nafatin nu’udar salan orijinál. Maski nune’e, iha tempu ne’ebá, “Maromak hatudu laran-sadia ba ita aman sira” (Lc 1, 72), hodi promete haruka feto seluk, Maria Nazaré nian, atu restaura no so’i mundu liuhusi nia Oan, Jezús Kristu, Maromak no ema, úniku, ho kbiit atu rekonsilia ita ho Maromak Aman no ita-nia Kriadór.

Kriatura doben ne’e ne’ebé Divina Providénsia hanoin mak Maria, nakonu ho grasa, hanesan Anju Gabriel dehan ba nia iha tempu ne’ebá:

“Ave, nakonu ho grasa, Na’i ho ita, ita rahun di’ak iha feto hotu sira leet no ita-nia oan rahun-di’ak liu”. Maria hatán ho umildade: “Ha’u ne’e Na’i nia atan de’it, halo tuir bá tuir ita-nia liafuan sira” (Lc 1, 26-38).

SIN ida-ne’e, umilde no jenerozu, muda umanidade nia istória, hodi kontribui ho grau aas ba umanidade nia salvasaun, ne’ebé monu tanba Adão no Eva nia fila-kotuk, no foti sae fali ho Maria Santíssima no Nia Oan-Mane Jezús, Makso’ik.

Don Bosco habelar devosaun ba Na’i-Feto ho títulu Auxiliadora/Tulun-Na’in, ne’ebé fó hanoin nafatin Maria Santíssima nia protesaun ba Kreda no Amu-Papa.

Iha kedas sei tinan 9, iha nia mehi profétiku dahuluk mak nia hetan manifestasaun kona-ba nia kampu no nia apostoladu iha futuru no rona Na’i nia lian ne’ebé dehan ba nia: “Ha’u sei fó ba ó Mestra”. No tuirmai, mosu kedas Señora ida ho majestade ne’ebé enkoraja nia atu serbisu, atu korrije labarik malkriadu sira-nia komportamentu.

Na’i-Feto mosu beibeik iha mehi ba Don Bosco no nia mak fitun ba ninia apostoladu. Nia sente katak títulu Auxiliadora ne’ebé nia hili adekuadu atu esprime ninia agradesimentu ba Virjen ba “tulun” barak nia simu no, hamutuk, atu invoka ninia protesaun ba Kongregasaun ne’ebé foin moris. Aleinde ne’e iha Don Bosco iha énfaze pastorál no pedagójika forte: Maria mak tulun iha dalan moris nian atu manán salan nia atake sira, atu sai livre husi forma oioin aat nian (espirituál, morál no fíziku) no liuliu atu atua buat di’ak.

Tan ne’e, mak ba Maria Auxiliadora, nia dedika monumentu rua ninia gratidaun ba Inan doben ne’e: monumentu fatuk, katak Bazílika Maria Ausiliatrice iha Torino (1868);monumentu moris Figlie di Maria Ausiliatrice / FMA (1872) sira ne’ebé oras ne’e namkari iha nasaun 95. Monumentu rua ne’e Na’i-Feto rasik mak hakarak hanesan haktuir iha Don Bosco nia mehi profétiku ida:  Señora ida akompaña nia liuhusi faze oioin ninia obra nia dezenvolvimentu, to’o iha «kampu, iha-ne’ebé kuda batar, fehuk, repollu, beterraba, alfase, no  modo-tahan seluk barak tan»: «Hateke dala ida tan, nia dehan mai ha’u, no ha’u hateke fali. Entaun ha’u haree kreda furak no aas ida. Orkestra ida, múzika instrumentál no vokál ida konvida ha’u atu hananu missa.  Iha kreda nia laran iha faixa naruk mutin ida, iha-ne’ebé hakerek ho letra boot: Hic domus mea, inde gloria mea»’ (MO 130).

Husi Don Bosco nia hakerek sira, ita foti pasajen ruma atu ilustra ninia domin ba Maria Santíssima:

“Imi hameno nafatin devosaun ba Na’i-Feto Auxiliadora no ba Jezús Sakramentadu”.

“Festa Maria Auxiliadora nian tenke sai prelúdiu ba festa eterna ne’eb’e ita sei selebra hamutuk loron ida iha Lalehan”.

“Sai devotu Maria Santíssima nia no konserteza ó sei haksolok”.

“Devosaun no rekursu frekuente ba Maria Santíssima. Ita nunka rona katak ema ruma bá Nia ho konfiansa no Inan Lalehan ne’e la rona kedas nia”.

“Iha Maromak nia oin ha’u deklara: natón de’it joven ida tama iha uma saleziana atu Virjen Santíssima tau kedas nia iha ninia protesaun espesiál nia okos”.

Don Bosco konfia ba Família Saleziana propagasaun devosaun ne’e nian, ne’ebé tempu hanesan, devosaun ida ba Maromak nia Inan, ba Kreda no ba Amu-Papa.

Hanesan S. João Paulo II nia konvite mai ita “Horik iha Maria nia eskola, rona nia lian, tuir nia ezemplu sira. Hanesan ita rona husi Evanjellu, Nia orienta ita ba Jezús: “Halo buat ne’ebé Nia dehan ba imi” (Jo 2,5). No hanesan uluk iha Caná Galileia nian, nia lori ba nia Oan-Mane ema sira nia difikuldade sira, hodi hetan husi Nia grasa hotu ita hakarak. Ita harohan ho Maria no liuhusi Maria. Nia Maromak nia Inan no ita-nia inan”.