Família sira nia vokasaun atu eduka oan sira mak tema katekeze Papa Francisco nian, iha kuarta 20 Maiu. Amu-Papa iha siklu reflesaun nian kona-ba família, loron ne’e nian nia fó konsellu ruma atu família sira hatene eduka oan sira iha responsabilidade ba an rasik no ba ema seluk.

Download

Papa Francisco destaka katak eziste regra matenek ida: eduka oan atu rona aman-inan sira no obedese ba sira; no aman-inan sira labele realiza knaar ida-ne’e e ho maneira ladi’ak atu la hatuun oan sira. “Relasaun entre aman-inan no oan sira tenkéser ida sabedouria nian, ekílibriu boot ida. Oan sira, obedese ba aman-inan sira, ida-ne’e fó ksolok ba Maromak. No imi aman-inan sira, keta halo oan sira hirus, hodi husu buat ne’ebé sira labele halo”.

Maski ida-ne’e buat ruma naturál, Amu-Papa fó hanoin katak, iha tempu atuál, iha difikuldade sira. Nu’udar ezemplu, nia temi kona-ba aman-inan sira ne’ebé haree oan sira iha kalan de’it, no ida-ne’e difikulta edukasaun. Sai difisil liután, tuir Papa Francisco, kazu iha-ne’ebé aman no inan haketak malu, situasaun ne’e, dala barak oan mak sai vítima.

Família no sosiedade

Ila tempu ikus sira ne’e,  ‘intelektuál no espesialista sira’ kritika edukasaun familiár ho forma oioin, akuza nia nu’udar autoritária, konformista no repressiva. “Buat ne’e hamosu fratura ida entre família no sosiedade; krize ida ne’ebé abranje ámbitu oioin, hanesan eskola, porezemplu, iha-ne’ebé kontinua iha tensaun no deskonfiansa entre aman-inan no profesór sira”.

No ‘espesialista’ sira-ne’e sai barak  – Amu-Papa fó atensaun – no foti aman-inan sira-nia papél, inkluzive aspetu íntimu sira edukasaun nian: personalidade, kreximentu, direitu no devér sira. Aman-inan sira lakon sira-nia funsaun, to’o esklui an rasik husi oan sira nia moris.

Nu’udar ezemplu, Papa  Francisco temi epizódiu iha ninia infánsia nian, haktuir ona iha okaziaun seluk, bainhira dala ida nia ofende profesora. Sir abolu nia inan ba eskola no, ho edukasaun, haksiak nia oan. “Maibé iha uma imi bele imajina saida mak akontese …”, Amu-Papa dehan. Ohin loron, nia observa, papél sira trok atiha fali, no aman-inan sira mak haksiak profesór sira.

Amu-Papa admite katak, modelu edukativu tempu uluk nian iha ninia limite sira, maibé, husi parte seluk, moris ohin loron nian sai ‘karak’ kona-ba tempu; no aman-inan sira, tan serbisu no preokupasaun seluk ‘lori lakon’ tiha sira, sira la iha tempu atu ko’alia, reflete no kontronta ho oan sira.

Nu’udar antídotu, Papa Francisco fó hanoin katak Maromak nia Liafuan bele oferese apoiu ida ba misaun edukativa família sira-nian. Nia hatutan tan katak, iha buat hotu nia baze, iha Maromak nia domin.

Papa Francisco remata nia reflesaun hodi afirma katak edukasaun familiár di’ak mak koluna vertebrál umanizmu nian. “Ninia ‘irradiasaun’ sosiál mak rekursu ida ne’ebé taka kuak sira, kanek sira, mamauk sira paternidade no maternidade nian ba oan sira ne’ebé la hetan sorte di’ak. No ‘irradiasaun’ ne’e bele halo milagre sira!”.