RV – Iha Katekeze kuarta nian, ba ema rihun 30 iha prasa S.Pedro, Amu-Papa Bentu XVI kontinua ninia reflesaun ba Tinan Fiar nian no iha nia meditasaun nia foka kona-ba ema nia hakaran kona-ba Maromak, hakaran misteriozu ida iha ema nia laran. Hanesan hakerek iha Katesizmu Kreda Katólika nian, hakaran ne’e “hakerek iha ema ida-idak nia fuan.

Asesu kópia ho lia-portugés

 

 

Bento XVI fó hanoin katak, liuhusi dimin, mane no feto koko grandeza no fafurak vida no realidade nian. “Se buat ne’ebé ita esperimenta la’ós iluzaun ida, se defaktu ha’u hakarak ema seluk nia di’ak nu’udar ha’u-nia di’ak rasik, entaun ha’u tenke dispostu atu desentraliza husi an rasik, atu koloka an ba ninia servisu, to’o hakribi an rasik”.

Sant-Padre destaka mós oinsá esperiénsia umana sira, hanesan amizade no esperiénsia fafurak nian, hatudu katak di’ak hotu ne’ebé ema koko ba iha diresaun mistériu ne’ebé envolve ema rasik; “hakaran ida-idak ne’ebé mosu iha ema nia fuan sai lia-hun (eco) kona-ba hakaran fundamentál ida ne’ebé nunka habosu kompletamente”.

Amu-Papa fó hanoin tan katak dinamizmu hakaran nian nakloke nafatin ba makso’in, maski nia la’o tuir dalan kle’uk. “Maski iha nakukun salan nian ahi-oan ne’ebé halo ema rekoñese di’ak ne’ebé loos, atu koko nia, no hahú dalan subida nian, iha-ne’ebé Maromak, ho nia don grasa nian, sei la husik atu fó nia tulun”.

No ema hotu, tuir Amu-Papa, mak ema la’o-rai, peregrinu ba lalehan, ita-nia pátria loos.  Nune’e, presiza liberta hakaran ne’ebé ema nia fuan iha, la bele hanehan mate. “Bainhira iha hakaran loke janela ida ba Maromak, ida-ne’e sinál ida ona prezensa fiar nian iha klamar, fiar ne’ebé grasa ida Maromak nian”.