Baucau – Loron 17  Maiu iha  domingu ne’e  mak  loron  solenidade Axensaun Na’i Jezús nian. Iha loron ne’e mak oratorianu no grupu oin- oin ne’ebé eziste iha komunidade santa Teresa d’Avila  selebra festa Madre Mazzarello nian.

Grupu sira ne’e mak hanesan : Infância Missionária, grupu Laura Vicuña, grupu Mazzarello  no mós  oratóriu rua mak Diwake no Teulale. Labarik no foin-sa’e sira no mós animadór/a sira ne’ebé partisipa hamutuk 150 resin ho Irmán sira hotu.

 Festa ne’e nia objetivu mak  atu liu husi atividade sira ne’e sira bele koñese di’ak liután Madre Mazzarello no nia virtude sira. Nune’e mós tulun sira atu iha amizade entre grupu sira ne’e.

Selebrasaun ne’e hahu iha tuku 15: 00 ho jogu amizade nian iha kampu ESSA Baucau.  Jogu sira ne’ebe hala’o mak : Hadau bandeira, jogu samean, Liurai feto, kuis espontánea Madre Mazzarello nian no dansa pare. Jogu hotu tiha labarik sira mai halibur hamutuk fali iha komunidade atu hala’o orasaun ne’ebé prepara ona. Iha momentu orasaun nian labarik sira reprezentante husi grupu ida-idak hasa’e ai-funan ba Maria hodi hanoin fali Madre Mazzarello no Don Bosco nia hanorin  ne’ebé dehan :  “habelar devosaun ba Maria no imi sei haree saida mak milagre”.

Orasaun hotu tiha madre Jacinta Gusmão nu’udar superiora komunidade nian, fó liafuan di’ak  ba labarik no foin-sa’e sira kona ba  Madre Mazzarello nia hanorin atu habelar  devosaun ba Jezús Eukaristia no ba Maria. Madre  mós haktuir kona-ba Maria nia milagre sira ne’ebé madre FMA sira esperiénsia iha komunidade sira iha Rai balun inklui Timor.  Hafoin mak kontinua ho divertimentu mai husi oratorianu no grupu sira. Labarik sira entuziasmu tebes iha festa ida ne’e maske  hala’o ho simples. Hotu tiha, sira ida- idak fila ba uma.

(Miranda Cruz – Alice Filipe – Albina Carmo)