Dili- Ohin iha Centro de Formação João Paulo II-Mazzarello Bakery, hala’o tiha abertura Training of Trainers (TOT) iha área produsaun hahán. Destinatáriu TOT ne’e maka formadór na’in 14, feto na’in 7 no mane na’in 7 husi Sentru Formasaun Cristál/Fundação Cristal. TOT ne’e realiza liuhusi parseria entre Cento de Formação João Paulo II no Sentru Formasaun Cristal no suporte finanseiru husi SEPFOPE, ne’ebé iha abertura ne’e marka nia prezensa liuhusi ninia reprezentante señor Albano Salem. Tuir oráriu sira sei hala’o treinu ne’e ba loron sanulu. Matéria sira ne’ebé aleinde kona-ba teoria no prátika produsaun alimentár, sira mós iha matéria kona-ba marketing, kooperativa, psikolojia serbisu nian.

 

Ba Centro de Formação João Paulo II, ida-ne’e la’ós ba dala uluk mak halo treinu kona-ba produsaun hahán nune’e mós food and beverage service, basá babain centro JP II simu estudante sira Hotelaria e Turismo, Venilale atu halo estájiu formasaun nian iha ne’e. Estudante sira-ne’e, hafoin remata tiha estudu sira mós hetan oportunidade atu serbisu iha Centro JP II no Mazzarello Bakery hodi dezenvolve liután sira-nia skills no mós sai fali treinadór/a ba ema seluk. Aleinde estudante sira, iha mós grupu seluk ne’ebé mai halo kursu te’in iha sentru ne’e hanesan grupu feto vulneravel sira no mós sira ne’ebé prepara an atu sai koziñeira ka maktei’n iha komunidade relijioza sira.

Tuir irmán Paola Battagliola FMA, provinsiál Saleziana/FMA sira-nian, ohin loron importante tebes prepara foin-sa’e sira ba servisu atu moris iha autonomia no bele kontribui ba nasaun nia dezenvolvimentu. Nia kontente liu ho pasu ida kolaborasaun no parserianian, tanba hodi serbisu hamutuk, ita bele fó liután kualidade ba formasaun. Señor Agostinho Gonçalves, diretór ezekutivu Sentru Formasaun Cristál agradese ba kolaborasaun no parseira ne’e, no hein atu ba oin bele dezenvolve liután oferta formativa, hanesan husi produsaun ba konfeksaun produtu tuir standard marketing nian.