Dili – Departementu juventude katólika dioseze Dili (DEJUKDDIL) horisehik, 5 Novembru 2012, organiza kampu Marianu ka Marian camp ba foin-sa’e sira hodi konvida joven sira husi eskola sekundária, universidade no parókia sira nian. Konvite ne’e hetan resposta husi foin-sa’e 100 ne’ebé halibur loron tomak eis Kámara Ekleziástika, atu hakle’an Na’i-Feto nia itineráriu moris no fiar nian hahú husi nia esperiénsia iha Nazaré, Ain-karim, Belein, Kaná to’o iha Jeruzalém.

 

Esperiénsia kampu marianu ne’e ba dala uluk hala’o iha Fuiloro iha tinan 1994 organiza husi FMA sira husi komunidade Balide. Esperiénsia furak ne’e ikus mai, FMA sira repete fali durante tinan hirak ne’e, liuliu agora iha preparasaun ba tinan 25 prezensa FMA iha Timor-Leste. Esperiénsia furak ne’e fahe mós ho juventude katólika dioseze Dili nian, ne’ebé responsavel ida mós mak irmán Angelita FMA.

Foin-sa’e sira, hakle’an tiha Maria nia moris no fiar, fahe mós sira-nia esperiénsia marian no hametin sira-nia konviksaun, simu mandatu misionáriu atu sai hanesan Maria maklorik Kristu nian ba foin-sa’e seluk, ba sira-nia komunidade no ambiente sira serbisu ba.

Sira taka sira-nia loron ho Maria ho Eukaristia iha Katedrál hamutuk ho Dom Albertu Ricardo, bispu dioseze Dili nian