Beleza Kazamentu Sarani nian
RV – Hodi fó kontinuidade ba siklu katekeze nian kona-ba família, Papa Francisco iha loron 6 Maiu ko’alia kona-ba beleza kazamentu sarani. Amu-Papa fó hanoin katak matrimóniu mak sakramentu ida, la’ós de;it serimónia ida akontese iha Kreda ho ai-funan, foto no roupa espesiál sira.
Kazamentu fó inísiu ba komunidade familiár foun, Amu-Papa afirma, hodi fó hanoin katak S. Paulo ko’alia kona-ba domin entre kaben-na’in sira nu’udar imajen domin nian entre Kristu no Kreda. Francisco esplika katak analojia ne’e la perfeita, maibé husi nia bele foti sentidu espirituál.
“La’en – Paulo hatenen – tenke hadomi nia feen ‘hanesan nia isin rasik’; hadomi nia hanesan Kristu ‘hadomi Kreda no saran an ba nia’. Maibé imi, la’en sira, ne’ebé iha-ne’e, imi komprende buat ne’e? Hadomi feen nu’udar Kristu hadomi Kreda? Ne’e la’ós halimar, maibé buat sériu!”.
Sakramentu kaben, hanesan Papa Francisco esplika, mak hahalok boot fia rno domin nian no fó sasin kona-ba korajen aru fiar iha beleza Maromak kriadór nia hahalok no moris domin ne’ebé lori atu hakat liu an rasik.
Francisco destaka katak desizaun atu “kaben iha Na’i” kontein mós diemnsaun misionária ida. “Defaktu, kaben-na’in sira partisipa, nu’udar fenn-la’en, iha Kreda nia misaun. Presiza korajen ba buat ne’e! Tanba ne’e bainhira ha’u kumprimenta ema sira foin kaben, ha’u dehan: ‘Hare bá sira ne’ebé ih akorajen! Basá presiza korajen atu hadomi hanesan Kristu hadomi Kreda”.
Aliansa konjugál buat ruma ne’ebé hariku Kresa, nune’e mós kazamentu ne’ebé sai ladi’ak haloKreda sai kiak, Papa Francisco dehan. Nia enfatiza katak S. Paulo iha razaun atu dehan katak kazamentu mak mistériu boot ida. “Mane no feto sira, iha korajen sufisiente atu lori rikusoin ne’e iha ‘sanan rai’ ita-nia umanidade nian, mak rekursu esensiál ba Kreda no ba mundu tomak. Maromak fó bensan ba imi ba buat ne’e!”.
