Dili – Formasaun interkongregasionál ba postulante no novísia sira baibain hahú iha fulan Outubru. Ba tinan 2013 sei hahú fali iha Janeiru, nune’e mak ba fulan ikus sira Setembru, Outubru no Novembru, programa tiha semináriu ruma hanesan tuirmai ne’e: komunikasaun sosiál, Tinan Fiar nian, diálogu interrelijiozu.

 

Padre Ilídio SDB iha segunda horisehik, aprezenta tema Tinan Fiar nian ho títulu “Espirtiualidade no Tinan Fiar nian” ba formandu/a sira inteekongregazionál hamutuk na’in 101 sura husi postulante to’o novisia, hodi hakle’an ho sira Amu-Papa nia Surat Porta Fidei. Tema ne’e mós maka nia aprezenta durante forum MJS iha Baucau, iha loron 30 Setembru 2012 iha Baucau.

Padre Ilídio hahú nia aprezentasaun hodi klarifika termu espiritualidade; espiritualidade katak husik Espíritu gia ita-nia moris atu sai hanesan Kristu; Espíritu maka fó karizma oinoin ba kongregasaun lahanesan atu kontinua Kristu nia misaun iha rai.

Tuir nia, ko’alia kona ba fiar tenke tutan nia ho dimensaun tolu ne’ebè importante liu iha moris espirituál: ita-nia relasaun ho Maromak, ho-an rasik, ho maluk sira.

Buat ne’ebé importante atu hala’o iha Tinan Fiar nian maka halo dalan fiar hahú hodi simu anúnsiu loroloron  nian iha istória pesoál no iha eventu sira, iha Maroma nia Liafuan, iha enkontru ho Jezús ne’ebé saran an gratuitamente. Maromak nia grasa halo ema loke fuan ba Na’i, presiza renova beibeik. Fiar mak dón ida ba ema hotu maibé husu resposta ida husi ema.

Tinan Fiar nian sai tempu atu hakle’an no fó sasin kona-ba fiar, haklaken fiar ho modu krítiku. Kreda presiza ema sira ne’ebé halo esforsu maka’as atu fó sasin liuliu iha moris hamutuk no koresponsabilidade tuir Evanjelu hanori, katak dook husi laran-rua. Fiar bele fó entuziasmu, maibé bele tau iha prova fiar ne’e rasik. Ita-nia sin ba fiar nunka mais definitivu, sempre iha risku, bele kria krize, nune’e loron-loron tenke renova ita nia motivasaun fiar nian. Keta ta’uk no hakfodak maibé simu nu’udar sinál frakeza umana. Santu sira mós liu husi krize maibé halo dalan nafatin to’o iha santidade.

Tinan Fiar nian fó mandatu mai ita ba evanjelizasaun foun, katak sai sasin kredivel ba mundu ohin-loron. Kreda simu mandatu ne’e nu’udar devér grave atu nune’e Evanjellu bele to’o ba ema hotu iha mundu. Sarani hotu-hotu iha responsabilidade atu buka meiu foun atu haklaken iha mundu. Tinan fiar sai okaziaun di’ak atu intensifika sasin karidade nian. Fiar lahó karidade katak MATE.