Dili – Tinan-tinan  irmaun Gilham husi Taizé mai Timor-Leste atu fahe ho foin-sa’e sira esperiénsia orasaun Taizé nian. Tinan ne’e nia mai fali hodi no fatin sira nia vizita maka Laga, Metinaro, Tibar no Dili.

 

Nune’e maka iha loraik sábadu 27 liubá, iha salaun SDB Comoro, nia halibur foinsa’e besik 100 husi parókia ruma Dili nian atu fahe ho sira esperiénsia Taizé nian. Nia hahú ho kona-bá Surat husi Taizé 2012. Títulu ba surat ne’e mak “Hakat ba solidariedade foun ida” ne’ebé irmaun Alois abade Taizé nian dirije ba foin-sa’e hotu.

 

Iha surat ne’e haktuir katak “laiha ema no sosiedade ida bele moris se laiha konfiansa”.  Maibé atu hahú solidariedade “presiza loke an ba ema seluk” liuliu ba ema mukit sira, ba sira ne’ebé la hetan serbisu hodi envolve iha asaun sosiál ruma. “Motivasaun atu hetan solidariedade foun ida mai husi konviksaun ne’ebé kle’an: entre konviksaun ida-ne’e, ida mak ita presiza ‘fahe vida’. Fahe vida sai motivu ne’ebé bele halibur ema fiar-na’in husi relijiaun oioin no mós ema ne’ebé la fiar”. Lee tiha surat  ne’e, foin-sa’e sira ba iha grupu hodi halo partilla kona-ba lia-husun ruma hanesan “Sá mak sei halo bainhira hasoru dezafiu atu harii solidariedade foun? Ita-nia resposta ba dezafiu pesoál no ema seluk nian la’ós atu bele hadomi liután?”

Iha enkontru ne’e mós partisipante sira rona sasin husi foin-sa’e ida naran Silvério ne’ebé ulk drogadu, oho ema no halo buat aat barak, maibé agora konverte an. Nia konversaun hahú bainhira ema sona nia iha kabun besik atu mate, maibé esperiénsia konsege moris. Na mia ida-ne’e oportunidade Maromak haraik atu filafali ba dalan loos. Nia husu foin-sa’e sira atu keta koko droga, tanba sei estraga de’it sira nia moris.

Hotu tiha partilla no sasin husi Silvério, irmaun Gilham esplika kona-ba karakterístika orasaun Taizé nian. “Importante atitude silénsiu nian atu rona Na’i ne’ebé hadomi ita no ko’alia mai ita. Hatene rona lori mós atu sai onestu ho an rasik no dehan ba Na’i Maromak “Ha’u mak ne’e, ne’e mak ha’u nia an”. Hafoin nia mós dehan katak orasaun Taizé mak orasaun simples ida no liuhusi knananuk ho fraze badak no repetitivu ita bele tama iha klima enkontru nian ho Maromak.