FLORIÑA BA MARIA AUXILIADORA  – 2015

APREZENTASAUN

Tinan 200 ona (iha 1815) mak ba dala uluk selebra Solenidade ba Maria Auxiliadora, loron 24 Maiu ida. Data ne’e tanba momentu istóriku ida iha Kreda. Papa tempu ne’ebá nian, Pio VII, Napoleão Bonaparte dadur tiha nia, liu tinan lima. Iha inísiu 1814, Napoleão hasoru momentu difisil no nia atu lakon ona funu. Iha 19 Janeiru restaura “Estados Pontificios” no 23 Janeiru Amu-Papa abandona ninia prizaun, moras no katuas. Durante nia viajen fila-hikas ba Roma, nia simu manifestasaun umildade husi makhorik sidade nian no povu sira, hakneak bainhira nia liu. Finalmente nia tama Roma iha 24 Maiu. Bainhira tama, Roma nia oan sira kore kuda sira husi Amu-Papa nia kareta no tau nia iha sira-nia kabás, hodi lori nia ba Bazílika S. Pedro nian. Tan motivu ida-ne’e Pio VII tau 24 Maiu nu’udar festa Maria Auxiliadora nian, no iha tinan tuirmai hodi ninia deliberasaun, iha 24 Maiu 1815, selebra festa dahuluk. Entaun iha tinan ne’e ita selebra tinan 200 selebra Maria Auxiliadora iha loron 24 Maiu.

Ita prepara an ba festa ne’e ho floriña saleziana sira. Ema ne’ebé la hatene saida mak floriña salesiana sira bele rona Don Bosco rasik ne’ebé esplika kona-ba ne’e:

“Prepara ai-funan ramallete ida atu oferese nia ba Maria iha nia loron festa nian. ¿Halo oinsá? Hodi halibur ida loroloron. ¿No oinsá halo ida-ne’e agora ne’ebé la iha ai-funan iha to’os? Iha imi-nia fuan. ¿No ai-funan ida-ne’ebé? Virtude ki’ik-oan ida atu pratika loroloron atu fó onra ba Maria Santíssima. Kumpre floriña ne’e hotu atu iha loron festa boot nian sei iha ramallete barak hanesan imi mós barak no atu ema ida labele falta ho ninia ai-funan ida. Imi fiar bá katak Maria Santíssima sei haksolok agradese liu ba imi-nia prezente”.

Tinan Bisentenáriu Don Bosco nia moris nian no Bisentenáriu Festa Maria Auxiliadora nian ita bele halo ramallete furak ai-funan nian ba ita-nia Inan no ita oferese mós ba dame iha mundu, ba ema hotu ne’ebé terus funu nia estragu sira, atu persegisaun relijioza sira la iha tan ona, ba moras sira hotu, ba vítima sira kalamidade naturál, ba ita-nia nesesidade hotu.

¡Floriña sira tinan ne’e nian Don Bosco rasik mak hakerek iha 1886! Imi bele adapta no modifika tuir kontestu ida-idak no bele hahú iha loron 23 Abríl atu remata iha loron 23 Maiu eh di’ak mós iha Maiu.

FLORIÑA BA FULAN MAIU

1. Bainhira liu iha Santíssimu Sakramentu nia oin, hakne’ak ho devosaun no fervór, hodi dehan iha fuan laran: – Hahí Jezús Kristu.-Jakulatória: Maria,ha’u konsagra ha’u-nia fuan ba ita.

2. Halo orasaun ida ho fervór ba Virje Maria atu ó-nia maluk ida la monu iha salan mortál iha fulan ne’e nia laran. –Jakulatória: Maksalak sira-nia subar-fatin, harohan mai ha’u.

3. Ida-idak husu ba nia maluk di’ak ida, eh ba ema seluk ne’ebé bele halo ida-ne’e, atu sujere ba moa saida mak nia tenke halo atu fó ksolok liután ba Maria, no hafoin halo buat ne’e.- Jakulatória: Virjen Maria, haraik mai ha’u grasa atu avansa ba beibeik iha virtude.

4. Halo promesa katak hakarak nafatin sai devotu Virjen Maria nian, buka lori nafatin ninia medalla iha kakorok no rein nia ho devosaun molok hasai. – Jakulatória: Virjen Maria, simu ha’u iha ita-nia mantu nia okos no hein ha’u husi buat aat hotu.

5. Atensaun no badinas maka’as atu harohan orasaun sira ema sarani nian; no ho modu espesiál orasaun ne’ebé rea molok han no han hotu tiha, orasaun iha klase eh iha estudu.- Jakulatória: Virjen Maria, halo atu ha’u hadomi ita lután loroloron.

6. Tan domin ba Virjen Maria, tahan ho pasiénsia defeitu sira ne’ebé ita deskobre husi ita-nia maluk, sira-ne’ebé labele korrije fasilmente. – Jakulatória: Virjen Maria, halakan ha ha’u-nia fuan ahi karidade nian.

7. Oferese ba Maria devosaun hotu halo iha fulan ne’e no husu perdaun ba nia ba neglijénsia sira. – Jakulatória: Virjen Maria, halo atu ha’u sai nafatin ita-nia devotu.

8. Uza didi’ak tempu; ne’e katak, la husi liu leet de’it minutu ida iha baruk, maibé uza hotu ba Maromak nia glória. – Jakulatória: Virjen Maria, halo ha’u manán lalehan.

9. Halo mortifikasaun ruma, isin nian no espíritu nian, atu onra Maria. – Jakulatória: Virjen Maria, haraik mai ha’u fuan ida puru no moos.

10. Korrije ho laran-midar maluk ruma ne’ebé ó hatene iha defeitu ruma, iha nia liafuan no iha nia hahalok. – Jakulatória: Virjen Santa, tulun ha’u atu rai di’ak ha’u-nia nanál.

11. Iha dadeer, bainhira hadeer, dirije hanoin uluk ba Maria hodi halo propózitu atu halo buat di’ak ruma atu fó onra ba nia durante loron. – Jakulatória: ¡Oh, oinsá ha’u haksolok se komporta di’ak ho Maria!

12. Harohan orasaun badak ida ba Santíssima Virjen atu nia tulun ita halo propószitu firme ida atu rai didi’ak virtude modéstia nian. – Jakulatória: Virjen Maria, halo ha’u fuan monu/hadomi ita-nia virtude sira.

13. Halo ezame konxiénsia ida ho kuidadu no prepara an atu konfesa hanesan ida-ne’e mak konfisaun ikus moris nian. -Jakulatória: ¡Oh, Maria, hasai ha’u nafatin husi salan!

14. Obediénsia ezata ba superiór/a sira, ho modu espesiál konfesór iha buat sira kona-ba klamar no ba mestre iha buat sira klase nian .- Jakulatória: Virjen Maria, sede sabedouria nian, harohan mai ami.

15. Mortifika nanál; abstein atu dehan liafuan ruma ne’ebé bele ofende karidade, morál no kostume di’ak. –Jakulatória: Virjen Maria, halo ha’u-nia isin no ha’u-nia klamar moos.

16. Husu deskulpa no perdaun ba ema ne’ebé ita ofende; hatudu liután domin ba sira ne’ebé ita la gosta. –Jakulatória: Virjen Maria, halo atu ha’u moris iha dame ho ema hotu.

17. Kadavés imi resita eh rona Gloria Patri hakruuk ulun iha sinál venerasaun nian ba Santíssima Trindade. – Jakulatória: Virjen Maria, Templu Santíssima Trindade nian, harohan mai ami.

18. Revista imi-nia hakerek sira, imi-nia livru sira, imi-nia kópia sira no se imi hetan buat ruma ladún apropriadu, atu fó onra ba Maria; soe iha ahi atu nia sunu tiha. – Jakulatória: Virjen Maria, odamatan lalehan nian, harohan mai ami.

19. Hanoin ho sériu ba devér sira estadu rasik moris nian ne’ebé falta beibeik, husu Maromak nia tulun no promete ba Maria atu korrije an. – Jakulatória: Virjen Maria,halo atu ha’u serve Maromak ho modu perfeitu.

20. Halo iha Maria nia altár nia oin, propózitu atu korrije an kusta karik bá husi defeitu ne’ebé ida-idak koñese iha nia laran. – Jakulatória: Virjen Maria,tulun ha’u atu koñese ha’u-nia an rasik.

21. Kadavés tama iha Kreda laran, foti aguabenta/bee-sarani no hasantu an ho fiar no devosaun. – Jakulatória: Virjen Maria, halo atuha’u nunka sai indiferente iha hahalok sira relijiaun nian.

22. Hanoin kontra devér ida ne’ebé ó-nia estadu moris nian ne’ebé ó falta beibeik, husu Maromak nia tulun no promete ba Santíssima Virjen atu korrije an. – Jakulatória: Virjen Maria, halo atu ha’u serve fielmente Jezús.

23. Konvida maluk ida no ho nia halo vizita ida Ba Jezús Sakramentadu no Maria. – Jakulatória: Virjen Maria,tulun ha;u atu ha;u sai santu.

24. Fó konsellu di’ak ida ba maluk ida no, se ha’u mak simu, buka tau iha prátika, tan domin ba Maria. – Jakulatória: Virjen Maria,, halo ha’u hetan don piedade nian.

25. Dilijénsia/badinas boot liu atu halo didi’ak serbisu sira ne’ebé impoin mai ita. – Jakulatória: Virjen Maria, tulun ha’u atu kumpre didi’ak ha’u-nia devér sira.

26. Harohan ba Santíssima Virjen atu tulun ita halo propózitu firme ida atu hadomi virtude modestia nian, pureza nian. – Jakulatória: Virjen Maria,inan santa pureza nian, harohan mai ami.

27. La halo falta ki’ik liu kontra regulamentu koléjiu nian.- Jakulatória: Virjen Maria, halo ha’u manán virtude obediénsia nian.

28. Atensaun boot liu atu rona santa misa no halo orasaun badak ba ita-nia maluk ne’ebé hadomi uitoan de’it Maria. – Jakulatória: Virjen Maria, haraik mai ha’u grasa atu manán virtude haraik-an nian.

29. Husik atu ema ne’ebé hatene di’ak ita ko’alia sai defeitu atu korrije, liuliu atu fó ezemplu di’ak. – Jakulatória: Virjen Maria, haraik atu ha’u bele koñese an rasik.

30. Tan domin ba Maria ha’u halo buat hotu posivel atu bá kedas tuir kedas sinu nia konvite. – Jakulatória: Virjen Maria,atu ha’u bele manán virtude obediénsia nian.

31. Tan domin ba Maria santifika rekreiu sira, hodi joga, bainhir aposivel iha komún, no konvida ho respeitu ba ksolok, ema ne’ebé tan motivu ruma, triste hela eh iha inklinasaun atu hela mesak. – Jakulatória: Virjen Maria,, halo atu ha’u keta halo triste ita-nia oan Jezús.