RV – Iha Papa Francisco nia katekeze, kuarta 29 ABríl 2015, tema mak kazamentu. Nia kontinua siklu katekeze nian kona-ba família no, ohin ne’e nia konsentra iha kazamentu.

Papa Francisco dehan katak sinál boot ida uluk ne’ebé Jezús halo, akontese iha konstesutu matrimóniu nian: milagre tua nian iha festa kazamentu iha Caná. “Halo nune’e, Jezús hanorin mai ita katak obra-prima sosiedade nian mak família: mane no feto ne’ebé hadomin malu! Ne’e mak obra-prima!”.

Download

Husi tempu ne’ebá to’o ohin, buat barak mak muda, Amu-Papa hateten, maibé Kristu nia sinál ne’e soi mensajen ida ne’ebé folin nafatin. Ia joven barak ne’ebé lakohi kaben, iha nasaun barak aumenta númeru separasaun nian no diminui númeru oan sira-nian. Sira mak vítima dahuluk no importante liu separasaun nian, Amu-Papa destaka, no bele iha nia konsekuénsia abanbairua.

“Se ó esperimenta, husi ki’ik kedas, katak kazamentu mak lasu ida ‘iha tempu determinadu’, inkonxiamente ba ó mós nune’e”. Iha joven barak mak lakon konfiansa iha família, no ida-ne’e preokupasaun ida ne’ebé importante atu komprende.

Ba Papa Francisco, difikuldade finanseira la’ós motivu ida mesak atu joven sira lakohi kaben. Balun dehan katak kauza ida bele mós feto nia emansipasaun, maibé ida-ne’e la’ós argumentu válidu, tuir Pontífise, maibé forma ida maxismu nian ne’ebé nafatin hakarak domina feto.

Loloos, Papa Francisco dehan katak kuaze mane no feto hotu hakarak atu iha kazamentu metin, maibé barak ta’uk atu sala no, maski sira sarani, la hanoin iha matrimóniu sakramentál. “Ta’uk atu sala mak obstákulu boot atu simu Kristu nia Liafuan, ne’ebé promete Ninia grasa ba uniaun konjugál no ba família”.

“Sarani sira bainhira kaben ‘iha Na’i, sira nakfilak iha sinál efikás Maromak nia domin nian. Sarani sira la kaben de’it ba sira nia an: sira kaben iha Na’i ba komundade tomak nia di’ak, ba sosiedade tomak”, Papa Francisco remata, hodi hateten katak semana oin nia sei kontinua reflesaun kona-ba beleza vokasaun matrimóniu sarani nian.