Dili – Iha loron 26, Komunidade S. Joao Bosco Balide hamutuk ho labarik no foinsa’e sira iha Oratório no Kursus Komputador, selebra  festa agradesementu ba  Madre Geral FMA nian, Me. Yvonne Reonguat. Selebrasaun ne’e hahú ho liafuan diak husi Me. Alexandrina Pinto Fma, nu’udar Diretora Komunidade Balide nian, hafoin orasaun hamutuk atu bele loke aktividade ne’e, hafoin kontinua ho haree filme kona ba Me. Yvonne nia vizita ba komunidade sira iha Timor iha tinan 2010. Hotu tiha ne’e kontinua ho Eukaristia santa ne’ebé selebra husi Pe. Inocêncio  Deamantino da Silva SDB. Tamba semana ne’e Kreda dedika mos ba loron vokasaun, nune’e Iha homilia Padre esplika kona ba signifikado vokasaun nian, katak; vokasaun mak bolu ida husi Maromak ba ema idaidak ne’ebé lahanesan. Balun bolu atu harii familia, balun moris mesak no balun fali atu tuir Kristu ( Reliozo/a) hodi moris tuir ezemplo Bibi atan diak nian. Padre mós konvida foinsa’e sira atu brani hatan ba Maromak iha sira nia moris, brani atu hatan “ Sim ” ba Maromak, labele sente tauk ka deskoragen atu husik sasan mundu nia atu bele tuir Kristu, atu haklaken Maromak ba ema seluk. Nia mós foti ezemplo husi Santu no Santa balun Salesiano nian ne’ebé maske mai husi familia  riku, maibe husik sira nia moris riku nian atu ba serbi no moris hamutuk ho ema kiak sira. Iha ikus Padre husu mós labarik no foinsa’e sira atu agradese Na’i ba Madre Geral nia prezensa  ne’ebé nu’udar Inan ida iha Instituto, hodi dedika nia an tomak atu serbi no gia Irman, labarik no Foinsa’e sira hotu iha mundu tomak.

Wainhira Eukaristia hotu tiha, iha aprezentasaun badak kona ba vokasaun, liu liu oinsa atu sai Bibi atan ne’ebé diak iha labarik sira nia leet, aprezentasaun ne’e prepara husi Madre sira Irman no Animadores sira balun. Labarik no foinsa’e sira sente haksolok iha loron ne’e, tamba maske sira rasik lahare Madre ho matan maibe sira sente besik wainhira hare liu husi Filme ne’ebé aprezenta ba sira.

Ikus liu hanesan baibain, ami taka festa ida ne’e hodi simu merenda ne’ebé  ami hetan husi ami nia Benfeitores sira ne’ebé laran luak atu suporta ami iha ami nia aktividade ida ne’e. Hafoin ami idaidak fila ba uma.

(Dolores Ribeiro)