Dili – Iha fulan tolu nia laran, husi Fevereiru to’o Abríl, irmán juniora FMA sira halibur loron rua eh tolu nia laran atu prepara sira-nia itineráriu formativu bazeia ba Projetu Formativu FMA nian.

Junioradu mak períodu votu temporáriu nian. Períodu ne’e bele dura husi tinan neen to’o tinan sia, no nia finalidade mak “prepara ema ba saran-an ida ne’ebé tomak ba Maromak iha la’o tuir Kristu, atu hala’o serbisu misaun nian” (VC 65; kf Konst 96).

Esperiénsia fundamentál ruma importante iha-ne’e mak halo pasajen husi idealizmu ne’ebé baibain iha ema ne’ebé laiha esperiénsia, hodi hakat ba konkretude realidade nian hodi aprende pasiénsia iha hakat kiik sira

Iha knaar dezenvolvimentu sira partikulár ba períodu ida ne’e hanesan, hakle’an esperiénsia kona-ba nia an rasik atu bele dezenvolve no simu nia realidade rasik no ema seluk nian, no dezenvolve sentidu hola-parte ba Institutu, atu purifika motivasaun vokasionál sira to’o ba unifikasaun progresiva ne’ebé prepara sira atu hatán sin ba nafatin.

Ita bele habadak katak iha junioradu irmán foin-sa’e sira kontinua sira-nia dalan formativu atu to’o ba maturasaun umana, maturasaun sarani no maturasaun vokasionál-karizmátika.

Hodi hateke ba Projetu formativu FMA nian, juniora sira halo konkretu itineráriu ba sira-nia dalan maturasaun iha aspetu hotu, hahú hodi halo SWOT analisys ba realidade interna no esterna hafoin individua karakterístika sira, objetivu, kondisaun, indikadór sira, meiu no kontéudu formativu.