Asaun misionária no evanjelizadora Kreda nian mak sentru ba Amu-Papa nia mensajen ba Loron Mundiál Orasaun nian ba Vokasaun da-52. Vokasaun sarani – Papa Francisco hakerek – karakteriza ho esperiésnia ézodu nian. Nune’e, konvite ho modu partikulár ba joven sira atu keta ta’uk atu sai husi an rasik no halo dalan, nafatin ho matan hateke ba ema sira ne’ebé presiza liu.

Download Amu-Papa nia mensajen

“Ézodu mak esperiénsia fundamentál vokasaun nian”. Iha Kreda misionária ida, “vokasaun sarani bele moris husi espriénsia misaun nia laran”, Amu-Papa hakerek, no ida ne’e posivel de’it se nia iha kbiit atu “ézodu” loloos ida, kompara ho Ézodu bíbliku ne’ebé Maromak nia Povu  halo hodi sai husi moris-atan ba moris foun, iha Kristu.

Iha vokasaun sarani ida-idak nia abut mak loos duni “sai husi komodizmu no rijidés an rasik nian atu bele sentra ita-nia moris rasik iha Jezús Kristu”. Sai husi an ne’e la signifika “despreza moris rasik no umanidade rasik, maibé bolun ida domin nian ne’ebe dada no lori ita hakat liu an rasik, hodi hamosu ézodu permanente ida husi taka an rasik ba ninia libertasaun iha don an rasik nian”.

Dinámika ézodu nian – Amu-Papa hakerek – la kona de’it ema ne’ebé simu bolu, maibé kona asaun misionária no evanjelizadora Kreda tomak nian: Kreda ida “ne’ebé sai”, “ho kapasidade atu bá hasoru Maromak nia oan sira iha sira-nia situasaun reál no partilla sira-nia kanek”. Papa Francisco hakerek: “Kreda ne’ebé evanjeliza sai bá hasoru ema, haklaken liafuan ne’ebé liberta Evanjellu nian, tau matan ho Maromak nia grasa klamar no isin nia kanek sira, hakmaan ema kiak no ema ne’ebé presiza”. Vokasaun sarani reprezenta empeñu konkretu ba servisu konstrusaun Maromak nia Reinu nian iha rai ne’e no nia konsekuénsia mak dudu ema ba empeñu sosiál liuliu ba kiak sira.

Amu-Papa Francisco husu ba foin-sa’e sira atu keta ta’uk inserteza no buat deskoñesidu moris loroloron nian ne’ebé iha risku atu hapara sira-nia mehi. Papa Francisco konvida sira atu sai husi an rasik no halo dalan tuir Jezús nia ain-fatin, hanesan Maria Virjen halo tiha ona, modelu vokasaun ida-idak nian, nia ne’ebé la ta’uk atu dehan ninia “fiar” ba Na’i nia bolun.