Venilale – “Bá Oratóriu hamutuk ho Don Bosco”, ida ne’e mak tema ba selebrasaun festa oratóriu zonál ne’ebé hala’o iha Venilale, loron 19 fulan Abril tinan 2015. Hanesan FMA nia programasaun Inspetoriál nian ne’ebé halo liuhusi ekipa pastorál juveníl, sei hili loron ida espesiál atu selebra festa oratóriu hamutuk iha zona tolu FMA No SDB nian: Dili, Baucau no Lospalos. Nune’e, husi Zona Baucau, Fatumaka no Venilale,  realiza ona atividade ida ne’e, iha ne’ebé hetan partisipasaun másima husi grupu sira oratóriu nian. Totál oratorianu ne’ebé partisipa hamutuk na’in 650.

Objetivu ba festa ida ne’e mak atu labarik (oratorianu) sira hola parte mós iha selebrasun Biceneinário Don Bosco nia moris nian ne’ebé nia tutun sei hala’o iha fulan Agostu mai (Don Bosco moris iha 16 Agostu 1815).  Objetivu seluk mak fó ba sira oportunidade atu hakl’an kona-ba Don Bosco nia moris liu husi jogu sira. Atividade sira iha festa ne’e,  hahú ho boas-vindas ba oratorianu sira hamutuk ho animadór no inan-aman balun ne’ebé akompaña, tuir mai iha animasaun atu koñese malu hafoin hahú kedas ho selebrasaun Eukaristia. Selebrasaun eukarístika prezide husi Pe. Amarianto Guterres SDB no konselebra husi Pe João Gaspar SDB. Han hotu tiha meiudia mak hahú ho jogu atu koñese Don Bosco. Jogu nia modalidade mak fahe reprezentante na’in 10 husi oratóriu ida-idak halo ekipa atu hetan valór ba sira-nia grupu hodi ba iha fatin sira ho naran sira liga ho Don Bosco. Animadór/a sira ne’ebé simu responsabilidade atu aníma, hala’o duni sira-nia knaar no partisiante jogu grupu nian halo didi’ak sira-nia jogu. Prémiu dahuluk ba oratorianu Maria Mazzarello Venilale, prémiu daruak ba oratorianu FMA Baucau….

Festa remata ho orasaun iha ne’ebé reprezentante husi oratóriu ida-adik le’e mensajen badak ba Don Bosco hafoin taka ho bensaun Maria Auxiliadora nian husi Pe. José de Sá SDB. Ne’e momentu furak liu, atu simu bensan ho Maria Tulun-Na’in nia intersesaun, tanba Nia mak iha Don Bosco nia moris, inspira nia atu tau matan ba labarik no foin-sa’e sira ne’ebé kiak no abandonadu. Hodi Maria nia intersesaun oratorianu sira fila ba uma ho hakmatek no ho ksolok.

Viva Don Bosco! Parabéns ba tinan atus rua moris nian!

(Yashinta Hoar)