Dili –  Enkontru dahuluk ho grupu primeiru idade  husi tinan 30 -44, ho Irman sira hamutuk 22.  Enkontru ne’e  hala’o iha Dili iha loron 11 Abril 2015. Tema husi   enkontru   ida nee mak foti husi Kongregasaun ba Institutu Vida Konsagrada no Sosiedade Vida Apostólika nia dokumentu daruak ba Konsagradu/a sira hanaran  “Scrutate”.   Enkontru hahú ho aprezentasaun dokumentu ne’e nian husi Pe. Helio Cabral SDB, hafoin fó pergunta ba reflesaun no sharing iha grupu.

Iha Pontu tolu ne’ebé  haklean iha enkontru ne’e mak :

• Objetivu Vokasaun – konvite ida atu sai profeta hodi hatudu ita nia identidade lolos nu’udar konsagrado/a ne’ebé los. Ita nia asaun pastoral sira ne’ebé ita halao la’ós nu’udar NGO maibe nu’udar mensajeiru  ne’ebé evanjelija Maromak. Buat ne’ebé halo ita diferente ho NGO sira iha asaun pastorál mak ita nia frutu serbisu nian tuir “Sequella Christi”.
• Tuir konsellu  Evanjéliku koalia kona ba radikalidade pastoral. Maromak presente iha situasaun hotu iha ita nia moris, nune’e nu’udar relijiosa ita tenke hatene lee sinal sira tempu  nian hodi hatan ba nesesidade tuir kontestu atual. Iha tempu hanesan nu’udar relijioso/a ita tenke fiel nafatin ba ita nia moris nu’udar ema konsagradu/a.
• Fó importánsia ba formasaun, liuliu husu  ba autoridade sira  ne’ebé kaer knar iha komunidade laran atu tau matan didiak ba formasaun, liuliu Formasaun  intelektuál, Kulturál no umana ne’ebé klean, nune’e bele hatan ba nesesidade mundu ohin loron nian.  Se laiha formasaun mak ita labele fo buat ne’ebé diak ba sira ne’ebé presiza, tan ne’e   presiza  formasaun  nafatin.

Ikus liu taka ho sharing iha grupu hodi hare pontu ne’ebé importante ba  moris konsagrada ohin loron nian.