Husi irmán Sílvia Lopes

Dili – Laran-manas misionária ne’ebé fundadór Infánsia Misionária (IM) nian S. Carlos de Forbin Jason husik hela, gia no anima grupu Infánsia Misionária Escola Maria Auxiliadora nian.

Fulan Outubru hanesan fulan misaun nian, sai momentu signifikativu liu ba grupu Infánsia Misionária iha mundu tomak liuliu iha ba grupu husi eskola Maria Auxiliadora, tanba fulan ne’e sai espasu furak ida atu sira halo asaun karidade konkreta liután.

Labarik sira hatene katak sira tenke halo buat ruma atu fahe ba maluk sira, nune’e buat hotu ne’ebé sira prepara durante fulan sira formasaun nian no traballu manuál sira, sira rai hamutuk atu buka osan ruma. Nune’e mak iha domingu Loron Mundiál Misaun nian (21-10-2012) sira loke mini-merkadu ida iha parókia Maria Auxiliadora, Comoro hodi fa’an sira nia produtu ne’e. Nia objetivu maka “labarik sira tulun labarik maluk”. Infánsia Misionária nia vizaun espirituál “labarik haklaken Jezús ba labarik seluk”,liu mós husi hahalok konkretu partilla nian ho sira ne’ebé kiak liu iha rai misaun. Maski osan ne’ebé labarik sira hetan husi bazár maka feto-faluk Evanjellu nia kontribuisaun, maibé sei haruka ba Obra Potifísia iha Roma no husi ne’ebá mak sei haruka ba fatin ne’ebé presiza. Ida-ne’e sai momentu formativu importante atu serbisu no fahe ba ema seluk rezultadu kolen sira nian, hodi kria mentalidade partilla laran-luak nian, mentalidade evánjelika doasaun nian importante liu atu haburas espíritu misionáriu iha labarik sira no liuhusi sira ema boot sira mós bele partisipa ho sira-nia inisiativa hodi sosa sira-nia produtu.