Ohin dadeer lee tiha listaúnika Prepozisaun sira ne’ebé husi 327 ne’ebé Grupu ki’ik sira hato’o redús tiha ba 57 de’it. Maski nune’e sei kontinua ninia revizaun no nia lista finál sei aprezenta loron 26 loraik  no loron 27 ba votasaun.

Delegasaun ba Síria

Iha abertura serbisu Kongregasaun Jerál ne’ebé hala’o ohin  dadeer. Sekretáriu Estadu, kardeál Tarcisio Bertone, fó sai kona-ba Delegasaun ne’ebé sei ba Damasco tuir Bento XVI ninia dispozisaun, atu hato’o Amu-Papa nia solidariedade, Sínodu nian no Kreda tomak ba populasaun Síria nian ne’ebé terus  maka’as oras ne’e. Tanba situasaun grave sira sei bá liutiha Sínodu no mós sei lori kontribuisaun husi oferta pesoál Padre Sinodál sira-nian hamutuk ho ida Santa Sé nian, “nu’udar jestu solidariedade fraterna ba populasaun tomak”.

Komunikasaun husi Sekretáriu Jerál

Hodi Sínodu Bispu sira nia naran, Sekretáriu Jerál Dom Nikola Eterovic esprime solidariedade ba relijiozu katóliku na’in tolu (Anselme Wasukundi, Jean Ndulani ed Edmond Kisughu) ne’ebé ema sekuestra iha sesta liubá iha Repúblika Demokrátika Congo nian, hodi husu sira-nia libertasaun lahó kondisaun.
Dom Eterovic mós hateten katak Amu-Papa fó ba Padre Sinodál Bispu sira Krús Bibi-Atan Di’ak nian ne’ebé, hanesan lee iha Evanjellu Lucas nian, lori bibi ida iha nia kabaas, atu hatudu bibi-atan nia laran-manas ba nia bibi sira.

Hafoin lee tiha Asembleia nia resposta ba Mensajen ne’ebé bispu Lucas Ly Jingfeng husi Xina haruka ba Sínodu. Nia esprime apresiasaun husi Padre sira ba bispu nia surat. Sínodu agradese Maromak sarani Katóliku Xina nian ba sira-nia  “fidelidade, piedade no sinseridade” hodi mantein “metin” ba Kreda. “Ami hatene katak taterus, persegisaun, orasaun no ksolok sai sarani iha Xina maka karan ida ne’ebé haksolok Maromak no enkorajamentu ida ba sarani hotu iha mundu”. Iha surat mós esprime katak maski nia no Bispu katóliku Xina  nian seluk la bele intervein “ami konsidera imi prezente espiritualmente”.

Eleisaun membru Kosellu Ordináriu

Ohin dadeer depoizde eskrutíniu daruak ho maioria relativa, hili tiha membru 12 Kosellu Ordináriu Sekretaria Jerál Sínodu Bispu da-13, organizmu ne’ebé harii iha Asembleia Jerál nia finál. Kompostu husi na’in tolu husi kontinente ida-idak: Áfrika: kardeál Napier, Turkson no Monsengwo; Amérika: kardeál  Dolan no  Scherer no Dom Jaime Silva Retamales; ba Ázia-Oseania kardeál Pell, Gracias no arsebispu Tagle Manila nian; Europa: kardeál Schönborn, Erdő no Dom Bruno Forte. Ba membru na’in 12 ne’ebé Sínodu hii hodi reprezenta bispu sira iha mundu tomak, aumenta tan na’in tolu ne’ebé Amu-Pap maka nomeia. Sira sei hela iha kargu ne’e to’o Asembleia Jerál Ordinária foun, iha knaar atu kolabora ho Sekretáriu Jerál atu ezamina proposta sira mai husi Bispu sira no Konsellu Jerárkiku Kreda Orientál Katólika sira, husi Konferénsia Episkopál sira, husi Dikastériu Kúria Romana nian no husi Uniaun Superiór/a Jerál sira-nian kona-ba asuntu sira atu trata  iha Sínodu tuirmai no preparasaun ba serbisu sira kona-ba ne’e.