Dili – Iha loron 27 Marsu, Irmán FMA juniora sira hamutuk ho formande sira na’in 36 (Aspirante, postulante no Novisa ), tuir semináriu kona-ba Liturjia iha uma Novisiadu Komoro hamutuk  ho Ir. Joanna Goik Fma.

Semináriu ne’e hala’o nu’udar formasaun ida atu hakle’an liután ami nia koñesimentu kona-ba liturjia liuliu iha Semana Santa, tuir Liturjia nia hanorin kona-ba ritu, sinál no símbolu sira ne’ebé  halo iha Semana ne’e  nia laran, hahú husi Domingu Ramos to’o Domingu Resurreisaun. Iha Liturjia, Semana Santa ninia tutun mak iha Vijília Paskál. Momentu ida ne’e mak nu’udar akontesimentu boot liu iha mundu nia istória katak Kristu moris hi’as husi mate, no Vijília ida ne’e hanaran vijília sira hotu nia  Inan.

Ho formasaun ida ne’e sai nu’udar preparasaun espirituál nian mai ami no tulun ami atu komprende didi’ak ritu sira ne’ebé uza durante Semana Santa nia laran no ninia signifikadu ida-idak, hanesan selebrasaun bensa Ramos, selebrasaun han ba dala ikus, Adorasaun ba krús no Vijília kalan bensan Lilin Páskua nian.

Formasaun ne’e hala’o durante dadeer tomak to’o Meiu dia, ne’ebé taka ho pregunta barak husi Irmán no formande sira ne’ebé  husu kona-ba oinsá hala’o Liturjia, tanba dala barak mak akontese oinseluk ka kahor malu ho devosaun populár sira no dala barak mós ema ida-idak ( Nailulik) troka liturjia tuir sira nia nesesidade pastorál nian.

(Alice Gama)