RV – Adorasaun, domin ba Kreda no misionariedade. Ne’e mak pontu prinsipál Papa Francisco ko’alia ba amlulik sira, relijiozu/a sira no diákonu permanente sira Napoli nian. Enkontru ne’e halo iha sábadu 21 Marsu, durante vizita ba Itália nia sidade ida-ne’e.

Fraternidade saserdotál

Papa Francisco rekoñese katak la’ós fasil atu lori ba oin fraternidade saserdotál, basá diabu sempre aprezenta tentasaun sira hanesan inveja, “ciúmes”, antipatia, hahalok sira ne’ebé la tulun atu iha fraternidade loos ida. Nia hateten katak sinál la iha fraternidade , iha presbitériu eh iha komunidade relijioza sira mak “gossip” sira. Nia uza espresaun “terrorizmu gossip nian”. “Ema ne’ebé halo gossip mak terrorista ida ne’ebé soe bomba ida, harahun ema seluk”.

Jezús – sentru moris nian

Amu-Papa tau iha foku nesesidade atu tau Jezús iha sentru moris nian. Maski iha vida konsagrada iha difikuldade sira, nu’udar ezemplu, relijiozu/a sira ne’ebé “la gosta” sira-nia superiór/a sira. “Se ha’u-nia sentru mak superiora ne’ebé ha’u la gosta, sasin la la’o. Se ha’u-nia sentru mak Jezús, ha’u harohan ba superiora ne’ebé ha’u la gosta (…) Maibé ema ida la hasai ha’u-nia ksolok. Iha sentru iha Jezús Kristu”.

Nia husik konsellu ba seminarista sira: se imi la iha serteza katak Jezús mak imi-nia moris nia sentru, di’ak liu imi hein uitoan to’o imi seguru, iha kontráriu, imi hahú dalan ida ne’ebé imi la hatene oinsá imi sei to’o rohan. No atu Jezús sai sentru moris nian, Maria mak tulun boot ida, Amu-Papa dehan: “Maria mak haraik Jezús mai ita”.

Espíritu pobreza no laran-sadia nian

Forma seluk atu fó sasin ne’ebé Papa Francisco hatudu ba amlulik sira nune’e mós ba konsagradu/ sira mak espíritu pobreza nian, maski balun la halo votu pobreza nian. Ita labele kesi an ba osan, Papa Francisco dehan, hodi fó hanoin kona-ba Rahun-di’ak dahuluk: “Rahun-di’ak ba sira ne’ebé kiak iha espíritu”.

Pontu ikus Papa Francisco destaka mak nesesidade laran-sadia nian, importante liu hanesan mós pontu sira seluk. Ema kiak sira tenke sai relijiozu/a no amlulik sira nia opsaun preferensiál. Amu-Papa hateten katak, dalaruma bele akontese katak la bá vizita viziñu ida ne’ebé moras tanba hateke hela ba programa telenovela nian. Kona-ba ne’e, Papa Francisco haktuir espizódiu ida bainhira nia sei arsebisu iha Buenos Aires: irmán sira koléjiu ida nian hadi’ak tiha sira nia uma ne’ebé antigu liu, sira tau iha kuartu ida-idak televizaun ida. “Iha oras telenovela nian, ó sei la haree irmán ida iha koléjiu! Ne’e mak buat sira ne’ebé lori mai ita espíritu mundu nian”, Amu-Papa fó hanoin.

Papa Francisco dehan katak buat sira-ne’e hotu bele evita liuhusi hahalok simples tolu: Adorasaun, domin ba Kreda no laran-manas apostóliku. Hodi fó atensaun katak Kreda la’ós NGO ida, Papa Francisco dehan: “Ha’u husik imi ho buat tolu: adora Jezús, hadomi Kreda, sai misionária/u”.