RV – Papa Francisco fó sai iha sesta, 13 Marsu, aniversáriu nia papadu ba tinan rua no durante omilia selebrasaun penitensiál, jubileu estraordinário ne’ebé tau iha sentru Maromak nia laran-sadia. “Tinan Santu Mizerikórdia nian, sei hahú iha Solenidade Imakulada Konseisaun 2015, 8 Dezembru, no taka iha loron 20 Novembro 2016, ho solenidade Jezús Kristu Liurai Lalehan no Rai nian”.

“Maun no biin-alin doben sira, ha’u hanoin katak Kreda bele halo sai evidente liután nia misaun atu sai sasin laran-sadia nian. Dalan ida ne’ebé hahú ho konversaun espirituál ida. Tanba ne’e, ha’u deside atu realiza Jubileu estraordinário ida ne’ebé tau iha sentru Maromak nia mizerikórdia. Sei sai Tinan Santu Laran-sadia nian (Ano Santo da Misericórdia). Mai ita moris iha Maromak nia Liafuan nia roman: ‘Imi sai laran-sadia hanesan Aman’ (Lc 6, 36)”, Amu-Papa hateten iha omilia sesta ne’e nian.

Durante Jubileu, leitura sira ba domingu tempu ordináriu eh komún nian sei foti husi Evanjellu Lucas nian, hanaran nu’udar “evanjelista laran-sadia nian”.

Anúnsiu ofisiál no solene Tinan Santu nian sei halo ho leitura no publikasaun “Bula” nian iha Domingu Divina Mizerikórdia nian, festa ne’ebé S. João Paulo II institui no selebra iha domingu liutiha Páskua, iha 2015, loron 12 Abríl.

Ritu inisiál no organizasaun

Ritu inisál jubileu nian sei hahú ho abertura “Porta Santa” iha Bazílika S. Pedro. Odamatan ne’e loke de’it iha Tinan Santu no simboliza konseitu katak, durante Jubileu, sei oferese ba sarani sira “dalan estraordináriu” ida ba salvasaun.

Ita hetan Porta Santa iha bazílika boot sira Roma nian: S. Pedro, S. Giovanni Laterano/João Latraun, S. Paulo Fuori le Mura no Santa Maria Maggiore. Bazílika sira-ne’e nia odamatan sei loke depoizde ida Bazílika S. Pedro nian.

Jubileu Laran-sadia/Miserikórdia nian Amu-Papa entrega ba Pontifísiu Konsellu ba promosaun Evanjelizasaun Foun mak organiza.

Istória Jubileu sira nian

Iha tempu antigu entre ebreu sira, jubileu mak tinan ida deklara nu’udar tinan santu no baibain akontese kada tinan 50, iha-ne’ebé tenke restitui igualdade ba Israel nia oan sira hotu.

Kreda katólika hahú tradisaun “Ano Santo” nian ho Papa Bonifácio VIII iha 1300. Nia halo planu atu iha jubileu ida kada tinan 100. Hhusi 1475, atu bele fó ba jerasaun ida-idak pelumenus Tinan Santu ida, jubileu ordináriu sai fali katak tinan 25. Jubileu estraordináriu bele de’it realiza iha okaziaun akontesimentu ida ho importánsia boot/partikulár.

To’o ohin loron, ita iha ona “Ano Santo” 26. Ida ikus mak Jubileu 2000 nian. Jubileu estraordináriu sira, ida ikus mak ida 1983, ne’ebé João Paulo II institui atu hanoin tinan 1950 Redensaun/Makso’in nian.

Kreda katólika fó signifkadu espirituál ba jubileu judaiku. Jubileu konsiste iha perdaun jerál, induljénsia ida nakloke ba hotu, no posibilidade ida atu hafoun relasaun ho Maromak no maluk sira. Nune’e, Tinan Santu mak nafatin oportunidade atu hakle’an fiar ho empeñu foun no sasin sarani.