Baucau – Sarani barak mak lahatene konteúdu sira-nia fiar nian nune’e la prontu atu fó razaun ba sira-nia fiar no esperansa. Iha ita-nia kontestu ohin nian ne’ebé fiar tradisionalista sai nafunan no buras maka’as hodi kahur-malu ritu jentiu, estilu, kultu matebian nian ho fiar kristán tuun-sa’e, sarani sira presiza iha identidade relijioza forte, sai sarani ho motivasaun no preparasaun husi pontudevista doutrinál. La’o ho Kreda nia dalan no atu hatán ba perigu  “sinkretizmu” nian (sinkretizmu mak kombinasaun forma diferente fiar nian eh krensa sira-nian; husi pontudevista bíbika sinkretizmu mak tau hamutuk kultu/hana’i ba Maromak no kultu/hana’i jentiu nian). Tanba ne’e mak “evanjelizasaun foun” sai prioridade ida, atu forma sarani koerente, ho kapasidade atu hatán ba fiar rasik, ho liafuan simples no lahó ta’uk (ezemplu ta’uk ba matebian sira bele hirus, ta’uk fekit…).

Nune’e dezafiu ida sarani sira tenke enfrenta mak dezafiu “identidade nian”: sé mak ha’u-nia Maromak? Ha’u-nia moris iha sintonia ho ha’u-nia konviksaun sira?  Dezafiu ne’e FMA TIN sira iha programasaun 2015 haktuir nu’udar “Hamrook ba fiar loos hodi manán dualizmu (sinkretizmu relijiozu) no superfisialidade”.  Atu hatán ba dezafiu ne’e FMA TIN identifika mudansa mentalidade ida atu halo Maromak nia Liafuan sai kritériu moris nian. Pasu konkretu mak halo formasaun bíblika hamutuk FMA no Komunidade Edukativa, iha ida-idak nia kontestu no ambiente.

Konkretamente,  komunidade edukativa FMA Baucau halo enkontru formasaun dahuluk iha loron 14 Marsu ho prezensa adultu sira-nian, animadór/a sira no joven ruma husi grupu  Mazzarello. Sira-nia enkontru hahú hodi entroniza Bíblia, hafoin iha input kona-ba introdusaun ba Bíblia no ambiente jeográfiku Bíblia nian. Iha introdusaun, Ir Jacinta Gusmão aprezenta dezafiu mai husi sinkretizmu relijiozu iha Timor-Leste. Dalabarak sarani sira la iha fiar forte tanba la hatene didi’ak sira-nia fiar, nune’e ba buka seguransa iha buat seluk: iha “biru”, “ai-abut”, urat, nst., atu hasoru moris nia frajilidade sira. Loloos ita iha Jezús, ita-nia salvasaun, ita iha Maromak nia Liafuan, ita-nia “biru” hasoru buat aat.

Partisipante sira fahe ba grupu lima ho membru 6/7 kada inklui FMA sira hodi hatán kuiz no jogu bíbliku nu’udar revizaun ba konteúdu ne’ebé foin estuda hamutuk.

Enkontru remata ho merenda hamutuk, hafoin Ir Alice hato’o ba animadór/a sira oratóriu nian kona-ba festa oratóriu zona Baucau-Venilale-Fatumaka nian ne’ebé sei hala’o iha loron 19 Abríl 2015.