Sarani sira lori Evanjellu ba mundu ho aten-barani, hodi manán ta’uk ho fiar no konxiente kona-ba nostaljia Maromak nian iha ema nia fuan: ne’e maka núkleu mensajen Sínodu kona-ba evanjelizasaun foun nian. Dokumentu provizóriu Sínodu nian horisehik dadeer aprezenta tiha durante Kongregasaun Jerál da-18.

Kusi mamuk ida ne’ebé hein atu hakonu nia ho bee moos ne’ebé fó moris: ne’e maka ilas atu ne’ebé uza atu aprezenta draft mensajen Sínodu nian. Ilas ida ne’ebé fó hanoin kona-ba ema kontemporáneu nia hamrook no nostaljia ba Maromak, maibé mós misaun evanjelizadora Kreda nian no nia knaar atu ba hasoru umanidade, hanesan Kristu halo ho samaritana iha posu.

Mensajen ne’e sei provizóriu, tenke hadi’ak no submete ba votasaun, iha ninia versaun definitiva, sesta oin. Maibé buat ne’ebé emerje,  to’o ohin loron, maka konxiénsia kona-ba difikuldade no dezafiu sira evanjelizasaun foun nian. Buat ne’ebé importante la’ós inventa estratéjia foun evanjelizasaun nian, Sínodu evidensia, basá Liafoun Di’ak la’ós produtu ida merkadu nian. Buat be presiza maka deskobre  fali métodu sira   atu halo ema hakbesik ba Jezús.

Draft  mensajen nian la haluha kategoria ekleziál no sosiál hotu – bispu sira, amlulik sira, konsagrada/u sira, família sira, foin-sa’e sira, polítiku sira bo ema barak seluktán – no ba hotu hato’o liafuan agradesimentu no enkorajamentu nian ba sira-nia serbisu no ba dezenvolvimentu integrál ema nian. Dokumentu provizóriu subliña mós importánsia diálogu interrelijiozu, obra sira karidade nian, edukasaun no evanjelizasaun ida ne’ebé uluknanai hahú husi membru sira Kreda nian.

Aleinde ne’e, eskema testu nian haree ba kontinente ida-dak no ba ida-idak oferese sujestaun no ezortasaun util ba evanjelizasaun foun, tuir área jeográfika. Buat ne’ebé konta, dokumentu provizóriu konklui maka sarani sira manán ta’uk ho fiar no iha korajen ida hakmatek nian atu lori Evanjellu ba mundu tomak, ne’ebé maski nakonu ho inkoerénsia no dezafiu, nafatin Maromak nia kriasaun.