RV – Sivilizasaun ida ne’ebé la fó fatin ba katuas no ferik sira “lori iha nia an virus mate nian”. Papa Francisco defende dala ida tan terseira idade sira, kontra kultura soe nian, durante katekeze audiénsia jerál iha Prasa S. Pedro, 4 Marsu 2015. Ko’alia kona-ba avó sira, Amu-Papa tau iha destake deficit iha solidariedade  ba katuas no ferik sira, no iha katekeze semana oin sei ko’alia kona-ba estasaun moris nian ida-ne’e nia valór.

Download

Sai katuas no ferik iha “sosiedade efisiénsia” nian, sosiedade ne’ebé la hatene halo saida ho tempu neineik no nesesidade sira ema katuas no ferik sira-nian, lori ba indiferensa… Maski nune’e, sira mak “rikusoin ida”, “rezerva matenek ita-nia povu nian”, nune’e ita “labele ignora”.

Soe ema fraku sira

“Kultura ohin nian hanoin ba katuas no ferik sira nu’udar naha-todan ida: no sá loos rezultadu ba hanoin ida-ne’e nian? Soe sira”. Papa Francisco la simu liu hahalok aat ida-ne’e, no iha nia majistériu nia kontinua destaka tema ne’e. “Buat ida aat liu atu haree katuas ferik sira ne’ebé ema soe! Ita hakarak hasai ita-nia ta’uk ba frakeza sira no aibé hodi halo nune’e ita aumenta iha katuas-ferik sira laran-susar tan ema la suporta sira no abandona sira”.

Salan abandonu nian

Deficit ne’e iha família no sosiedade ida-idak nia fuan iha sira-nia modu atu konsidera otas katuas-ferik nian. Oan sir ane’ebé soe sira-nia inan-aman katuas iha uma ba katuas sira hodi la ba haree sira, halo “salan mortál”, Papa Francisco hateten.

“Ema katuas mak ita “

Papa Francisco fó hanoin  Pap Bento XVI nia liafuan ne’ebé dehan katak “sivilizasaun” ida nia”kualidade” ita bele “julga mós liuhusi oinsá trata ninia ema sira ho idade katuas-ferik”. “Katuas no ferik sira mak mane no feto sira, aman no inan sira ne’ebé uluk ba ita iha ita-nia lurón sira, iha ita-nia uma sira, iha ita-nia luta lorloron nian atu hetan moris dignu”.

“Igreja labele no lakohi konforma nia an ho mentalidade ida impasiénsia nian no liután indiferensa nian iha relasaun ho ema katuas-ferik sira. Ita tenke hafanun sentidu kolektivu gratidaun nian, apresiasaun nian, ospitalidade nian, halo katuas-ferik sira sente parte moris ninia komunidade nian… Ema katuas no ferik la’ós ema leet. Ema katuas no ferik mak ita”. Ita mós kleur eh besik, sei sai katuas eh ferik. “No se ita la aprende atu trata didi’ak katuas-ferik sira, ema mós sei trata ita nune’e”.