Dili – Sentru Juventude Don Bosco Railaku (Ermera) loke iha fulan Agostu 2012 hodi foti Don Bosco nu’udar padroeiru. Ideia loke misaun ne’e hahú ho vokasaun leigu ida nian, Ir.Nico Lay, ne’ebé iha hakaran boot atu tama iha VCD (Volontario Con Don Bosco) katak voluntáriu ho Don Bosco. VCD sanak ida husi Família Saleziana ba mane-klosan sira ne’ebé hakarak konsagra sira nia an ba Na’i hodi moris tuir votus 3: kastidade, pobreza, obediénsia maibé moris iha vida sekulár, katak konsagradu ativu  maski kontinua moris baibain iha serbisu no knaar hotu hodi sai sasin Evanjellu nian tuir espirituallidade saleziana.

Ho autorizasaun husi Pe.João Paulino Guterres,SDB, Provinsiál SDB nian, ami hahú loke sentru juventude ne’e. Iha fulan rua nia laran iha ona joven no labarik sira besik 300 ne’ebé frekuenta kursu komputadór no Inglés iha fatin ne’ebá. Familia Lay mak oferese uma no fatin hodi halo sai sentru ba foin-sa’e sira iha Railaku ne’ebé iha mehi atu Don Bosco tama iha rai ne’ebá.

 

Ir.Angelita Gomes FMA ne’ebé servisu iha departementu pastorál juveníl dioseze Dili nian sai forsa motivadora ba abertura sentru ne’e nian, katak atu bele fó posibilidade ba foin-sa’e sira atu dezenvolve sira-nia talentu maibé liuliu atu sai fatin no uma ba foin-sa’e sira hodi aprende reza, hadomi malu no tulun malu iha domin, damen no ksolok. Família barak husi Railaku agradese tebes ba sentru ida ne’e no husu FMA sira nia presenza iha rai ne’ebá.

Maria mak halo buat hotu….ida ne’e mak moto ba uma Railaku nian. Ir Angelita konvensida katak “Maria Tulun-Na’in mak lori ami ba loke sentru-uma Railaku no Nia sei tulun no hamahan foinsae sira hotu ne’ebé hela iha ne’ebá”.