Dili – Inspetoria FMA Timor-Indonésia ohin halo festa. Loron 28 Fevereiru, memória mensál Don Bosco nian (basá Fevereiru tinan ne’e iha loron 28 de’it), Inspetoria TIN halo instalasaun ba Provinsiál foun “Irmán Alma Castagna”. Prezente iha eventu ida-ne’e FMA sira husi komunidade 12 iha Timor no Indonesia, foin-sa’e sira, foin-sa’e na’in tolu konsellu nasionál MJS nian, SDB sira no membru sira seluk Família Salesiana nian.

Eventu ne’e hahú ho “akollimentu” Irmán nian ho tebe-dai iha uma ikus Ir Alma hela bá, katak, komunidade Divina Providénsia” hodi akompaña to’o iha novisiadu. Hafoin depoizde resesaun ne’e,  iha selebrasaun eukarístika, prezide husi Vigáriu Provinsiál salezianu sira-nia, Pe. Apolináriu Neto no konselebra husi Pe, Agostinho Soares, Pe. Manuel Fraile, Pe. Manuel Pinto, Pe. Agung. Mia remata, hatutan ho almosu konfraternizasaun no konvíviu ida. Joven sira husi komunidade Balide aprezenta drama no múzika kona-ba David nia eleisaun no hafoin remata ho knanauk hamutuk “Hino do Bicentenário de nascimento de Dom Bosco”.

Serimónia “fó posse” ne’e simples de’it: hahú hodi rona Madre Jerál nia Dekretu nomeasaun ne’ebé madre Paola mak lee liuhusi gravasaun nia lian nian. Madre Paola, eis-provinsiál, oras-ne’e iha Roma, nu’udar Konselleira jerál, nune’e razaun boot liután atu nia mak hatutan lia-tatoli ida-ne’e ba FMA sira, Família Saleziana, foin-sa’e sira ne’ebé ohin ahalibur ba eventu ida-ne’e. Hafoin entrega símbolu Maromak nia Liafuan, nu’udar matadalan ba provinsiál foun nia ain-hakat sira no entrega ba Maria Tulun-Na’in.

Madre Alma taka ho ninia diskursu ne’ebé ami tranzkreve ho modu kompletu hanesan tuirmai-ne’e:

«Obrigada ba imi-nia prezensa hotu-hotu iha-ne’e, padre sira, irmán sira, leigu sira, foin-sa’e sira. Ha’u fiar katak Maromak nia Liafuan gia nafatin ita-nia dalan, gia nafatin ita-nia moris no ha’u halo esperiénsia ida-ne’e iha fulan ida-ne’e. Molok Madre Jerál telefone, iha primeira leitura iha pasajen ida-ne’e: “Foti matan hateke ba Jezús. Nia mak hatudu dalan fiar nian”. No loron tuirmai telefone. No bainhira nia ko’alia, ha’u hanoin ba lista karakterístika inspetora nian ne’ebé irmán sira hakerek bainhira ita halo konsultasaun. Lista ida-ne’e ha’u iha iha ha’u-nia computer. Bainhira Madre Jerál tutan tuun tutan sa’e tanba la bá kedas iha buat ne’ebé tenke bá, iha ha’u-nia kakutak sai “fuan inan nian, domin ba Kreda no Institutu…iha ha’u-nia laran ha’u dehan lae, lae! Ha’u lae, ha’u lae… Depois ikus nian “di’ak Madre”. Loron ne’ebé komunika, imi iha ho ha’u. Buat ne’ebé Maromak dehan iha primeira leitura loos nian ba ohin [no orsida ha’u agradese tan imi hili festa Don Bosco nian] lian nune’e: “Nia sei sai ó-nia Maromak se ó la’o tuir Ninia dalan”.

Aban [Domingu II Kuarezma nian] iha Jezús ne’ebé sa’e, la’o hamutuk ho eskolante sira, Abraaun ne’ebé la’o hamutuk ho Isaac… nune’e ha’u interpreta… karik demais, maibé Maromak hakarak hatudu nu’udar íkone “dalan”, “la’o”, “sa’e”. La’ós la’o de’it, la’ós pasiar de’it , maibé sa’e, tanba Jezús aban sa’e foho, no foho ida-ne’e aas; la’ós pasiar ki’ik-oan ida.

Iha Kapítulu mós, ita foti nuudar íkone “Emaus”, ema ne’ebé la’o, la’o nafatin. Entaun, ha’u hanoin íkone ida-ne’e la’ós mai ha’u-nia an de’it. Jezús bolu ema na’in tolu atu la’o hamutuk ho Nia; Abraaun la’o ho Isaac; Jezús mós bainhira haruka eskolante sira, Nia haruka na’in rua-rua, nunka mesak. Nune’e, ha’u konfia katak ida-ne’e dalan ne’ebé ita sei hala’o hamutuk. La’ós dalan ida ne’ebé ita inventa. Tanba ne’e mak ha’u gosta imi ohin hili misa komemorasaun Don Bosco nian. Ita tama iha dalan ida ne’ebé uluk kedas Don Bosco hatudu tiha ona. Irmán sira, padre salezianu sira, foin-sa’e sira, leigu sira hamutuk la’o atu lori labarik no foin-sa’e sira ba Jezús. Ida-ne’e de’it mak diresaun…ida-ne’e loos de’it. Ba ida-ne’e la iha ‘ke kiri dan ke kanan’… iha loos de’it. Nune’e ita labele inventa dalan seluk maibé tenke tuir Jezús.

Entaun ha’u agradese… ita foin rona  madre Paola ninia lian [grava no haruka husi Roma atu lee dekretu nomeasaun nian]. Maski nia halo lian tuun liu, maibé, ne’e madre Paola. Ita kontinua dalan ne’ebé tinan ruma eh tinan barak liubá Inspetoria komesa. Ema mak troka…. uluk aas hanesan ne’e [hatudu ho jestu], agora aas hanesan ne’e, maibé, diresaun nafatin hanesan. Buat ne’ebé ita hili, ita la husik. Ita kontinua hamutuk ho fuan no laran tomak. Tan ne’e, dala ida tan ha’u agradese ba imi-nia prezensa tanba mai ha’u dehan katak iha hakaran, iha vontade atu kontinua la’o ba oin…atu la para  iha klaran maibé atu fó an, atu fó ain, atu ita hamutuk bele la’o.

Obrigada barak!»