Labarik Infánsia Misionária Balide (Dili) sira nia empeñu ba Kuarezma:

“Ami labarik grupu infansia misionaria husi FMA – Balide, iha tempu Quaresma ida ne’e nia laran ami halo ami nia asaun pastoral  hodi ba vizita ema sira ne’ebé moras no mos kiak. Nune’e ohin, hamutuk ho kolega sira nain sanulu no mos Me. Dolores Ribeiro Fma, ami halao vizita  ba Avo feto ida  ne’ebé moras isin maten no hela mesak ho Senora ida ne’ebé tuulun nia, sira hela iha suku Mascarenhas- Balide. Ami sente kontente atu halao esperensia ida ne’e;  tamba  tulun ami atu sai laran luak hodi  fahe ho ema seluk ne’ebé  presiza, ami nia tulun. Ami hatene katak sasan sira ne’ebé ami fo laos ida ne’ebé diak liu ka barak liu. Maibe ami fo ho ksolok no domin boot, no hakarak hatudu ami nia solidariadade ho sira. Husi buat ne’ebé  ami iha mak ami fo, no buat ne’ebé  ami nafatin hakaas an atu  fo  mak ami nia orasaun ne’ebé bele akompana ema sira ne’e iha sira nia moris, liu liu atu Maromak hamahan nafatin sira no haraik ba sira konsolasaun atu simu sira nia moras no haraik mos grasa saude isin diak nian  liu husi aihan sira ne’ebé sir a bele han lor -loron . Aktividade ne’e ami halao bebeik ona iha tempu forte nia laran, ne’ebé husi osan no merenda oituan ne’ebé ami iha, ami tau hamutuk atu fahe fali ba ema hirak ne’ebé presiza. Nu’udar labarik Missionaria Ami sente kontente atu halao aktividade ida ne’e, tamba ami pratika formasaun sira ne’ebé durante ne’e ami aprende iha ami nia formasaun durante loron Quarta Feira. Ami hakarak atu halao bebeik Vizita ida ne’e ba fatin fatin no ami pronto atu fahe ho sira buat  ne’ebé ami bele fo atu tulun sira”.