Irmán doben sira,

 

            Iha inísiu Kuarezma nian no iha loron ida-ne’e iha-ne’ebé ita hanoin ho modu espesiál Maria Tulun-Na’in nia prezensa, ha’u hakarak dirije ba imi ho apelu ida.

Ita labele hela indiferente hasoru konflitu oioin ne’ebé atraversa mundu no hamate inosente sira ba beibeik, hamosu destruisaun, pobreza, persegisaun no terrór. Notísia sira to’o mai ita liuhusi meiu komunikasaun sira no iha kontestu barak iha-ne’ebé ita prezente, ita sai sasin ho modu kontínuu. Dalabarak foin-sa’e sira, labarik sira, feto sira mak sai vítima prinsipál. Violénsia mak kauza prinsipál ida husi sira seluk pobreza nian.

Ita-nia misaun edukativa, ne’ebé ita hala’o loroloron iha ita-nia komunidade edukativa sira, mak dalan prinsipál atu harii kultura ida dame nian. Maski nune’e ha’u hakarak konvida imi atu akontesimentu triste istória nian ne’e motivu ida orasaun no renovasaun empeñu nian ba dame.

Iha dalan kuarezmál ida-ne’e ita sai ida de’it ho Kontinente lima atu harohan hamutuk Rozáriu ho intensaun espesífika ba dame iha mundu, iha família sira, iha komunidade sira, iha ema ida-idak nia fuan.

Iha ninia simplisidade no ninia profundidade, orasaun kontemplativa ida-ne’e tulun ita atu medita mistériu sira Na’i nia moris nian, liuhusi Maria nia fuan, Nia ne’ebé besik liu ba Na’i, no tau hamutuk akontesimentu sira mundu nian iha Ave Maria.

Ita tau ita-nia an iha Maria nia eskola, misionária dame nian, atu aprende moris dame iha ita-nia relasaun sira no atu naksira dame iha ita-nia ambiente moris nian hodi implora atu dame hakonu mundu. Nia mak Mestra matenek, ne’ebé lori ita ba koñesimentu ida kle’an ba beibeik kona-ba nia Oan-Mane nia mistériu. Nia mak Mestra la’ós de’it iha sentidu katak nia haree, koñese, maibé liuliu iha sentidu karak nia halo esperiénsia, moris iha nia An rasik difikuldade fiar nian, haraik-an servisu nian, disponibilidade akollimentu nian, terus, ksolok festa nian, espetativa mundu ida dame nian moris husi Jezús nia Paixaun, mate no moris-hi’as.

Ita konsagrada no edukadora saleziana sira iha knaar iha Kreda atu halo sai vizivel komuñaun iha Maromak nia Povu liuhusi relasaun sira karakteriza ho dame, ho karidade, ho servisu atu hahí Trindade, komuñaun domin nian, “oseaniu dame nian” ne’ebé, salva no umaniza mundu, ho ita-nia kontributu.

Rozáriu kria komuñaun no bele habiit komuñaun no dame. Enkuantu responsavel sira nasaun nian buka solusaun polítika ba krize atuál sira atu lori hikas dame, ita intensifika orasaun ba dame ho rozáriu iha liman no ho vontade desidida atu sai feto sira dame nian iha ita-nia moris loroloron nian hodu halo jejún husi “gossip” sira ne’ebé la haburas fraternidade.

Ho haraik-an no laran-metin ita implora, ho Maria, don boot dame nian no konstroe hadulas mundu korrente moris ida orasaun no dame nian no ha’u konvida imi atu haka’as an pesoalmente no komunitariamente atu hili atitude no jestu sira dame nian, hodi husik buat hotu  ne’ebé bele bá kontra dame. Ita bele tulun malu atu haburas kultura dame nian ne’ebé auténtika iha ita-nia moris loroloron nian. Ida-ne’e mós mak empeñu ne’ebé ami foti nu’udar Konsellu jerál.

Don Bosco iha tinan bisentenáriu nia moris nian tulun ita atu deskobre fali valór Rozáriu nian no atu halo ita-nia uma sira, hanesan nia husu mai ita atu harohan Ave Maria loroloron, uma sira ne’ebé dame horik bá no iha-ne’ebé forma mahalok dame nian ba mundu. Ha’u kumprimenta imi ho afetu no hamutuk nafatin ho imi iha komuñaun kle’an orasaun nian ho Maria.

 Roma, 24 Fevereiru 2015

Ir Yvonne Reungoat

Superiora jerál