Sínodu: sarani sira lori fali esperansa ba mundu ida iha krize laran
Faze dahuluk serbisu iha Grupu Ki’ik durante Sínodu Bispu sira-nian maka diskusaun kona-ba pontu mahuluk sira husi Relatio post disceptationem, no taka ho aprovasaun Relatóriu husi Grupu Ki’ik sira no aprezenta tiha ba Kongregasaun Jerál da-17 ohin dadeer. Relatóriu rekolle sujestaun no reflesaun sira, opiniaun konverjente no kontráriu. Ne’e maka sínteze dahuluk serbisu Sínodu nian, no husi ne’e sei formula Prepozisaun sira.
Iha Grupu Ki’ik 12: iha lia-alemaun1, iha lia-fransés 2, iha lia-españól 3, iha lia-italianu 3, grupu 4 iha lia-inglés.
Maski Grupu Ki’ik sira tuir métodu lahanesan – balun eskemátiku liu, balun diskursivu liu – hotu-hotu hateke ba rezultadu ida de’it: lori fali esperansa ba mundu ida iha krize, iha modernidade nabeen, ne’ebé tempu hanesan iha nostaljia no auzénsia Maromak nian. Sá loos maka Kreda tenke iha nu’udar objetivu? Uluknana’i tenke halo ezame konxiénsia nian: se ko’alia kona-ba evanjelizasaun foun – bispu sira dehan – ne’e katak sarani sira lakon tiha ona buat ruma, buat ruma ne’ebé Kreda la hatene oferese. Aleinde ne’e atu evanjeliza presiza uluk evanjeliza an rasik, nune’e nesesidade sakramentu peniténsia nian.
Pontu fokál seluk mak diálogu ekuméniku no interrelijiozu: ida uluk halo sai kredivel anúnsiu evanjéliku; daruak, liuliu se bazeia ba koñesimentu kle’an kona-ba Bíblia no sasin moris nian, tulun iha difuzaun Maromak nia Liafuan nian (iha nasaaun sira ho maioria musulmanu mós).
Labele ignora krize kle’an iha família sira: núkleu evanjelizasaun nian, enkoraja inan-aman nu’udar katekista dahuluk ba oan sira hodi fó importánsia ba sakramentu kaben. Iha ótika ida-ne’e, fó espasu ba avó sira no ba feto sira, sujere ba sira posibilidade ba estudu bíbliku. Kona-ba minsitériu ida ba katekista sira asuntu sei nakloke hela – hanesan mós ba leigu sira – importante iha faze hotu evanjelizasaun foun nian.
Atensaun partikulár ba polítiku sarani sira, koerente ho sira-nia fiar, bispu sira dehan atu sira iha sira-nia knaar, husik atu konxiénsia loos no valór fundamentál gia sira. Iha kontestu ida-ne’e, mai konvite atu haburas obra justisa sosiál no karidade nian, tuir Doutrina Sosiál Kreda nia hanoris, no mós tanba opsaun ba kiak sira maka halo anúnsiu Evanjellu nian sai kredivel no kria oaze loos ida ba enkontru ho Maromak.
Proposta espesífika ruma maka revizaun ba prátika katekeze nian ni sakramentu inisiasaun sarani no misaun mundiál evanjelizasaun nian, ne’ebé Amu-Papa bele lansa iha Tinan Fiar nian.
Mass-media mós hetan atensaun durante Sínodu: meiu komunikasaun nian lori lalakon sentidu sagradu nian, maibé se uza ho modu korretu bele sai aliadu evanjelizasaun nian, tanba posibilidade difuzaun boot meiu ne’e nian ho linguajen komprensivel ba hotu.
Grupu ruma husu atu Sínodu reflete liután kona-ba globalizasaun no sekularizmu – tanba mediokridade doot iha vida kristán – atu halo klareza kona-ba papél karizma sira-nian no oportunisase sira oferese ba Kreda, atu rona liután foin-sa’e sira no fó énfaze boot liután ba profesór/a sira no sentru sira edukasaun nian nu’udar instrumentu evanjelizasaun nian.
Parókia no komunidade ki’ik sira simu konvite atu “halo rede” no fó hanoin katak pároku maka katekista dahuluk. Sentrál mós referénsia ba santu no mártir sira nu’udar sasin kredivel anúnsiu Evanjellu nian no kestaun imigrante sira nian, ne’ebé tenke inklui iha inkulturasaun Maromak nia Liafuan nian. Finalidade ikus, maka lori ba enkontru haksolok nian ho Kristu.
Molok Kongregasaun remata, Padre Sinodál sira fó liafuan ba ouvinte ruma. Iha Sínodu ida Bispu sira-nian ne’ebé ko’alia barak kona-ba leigu sira, sira ne’ebé intervein husu atu amlulik sira “iha korajen atu sai imi-nia an rasik, keta halo imi-nia an hanesan ho hanoin dominante ohin-nian, propoin lahó ta’uk lialoos fiar nian. No ami sei tuir imi, basá ami hamlaha infinitu kona-ba buat ruma la-nahas no loos”.
